Mıhaıl Mıshýstın Almatyda ótken Eýrazııalyq úkimetaralyq keńes otyrysyn qorytyndylady
Reseı Úkimetiniń basshysy keıbir baǵalaýlar boıynsha, 2020 jylmen salystyrǵanda bıyl EAEO-da aýylsharýashylyq óniminiń óndirisi dollarmen eseptegende 20 paıyzǵa artatynyn aıtty.
«Qazir mundaı taýarlarǵa degen ishki qajettilikti tolyq qanaǵattandyryp otyrmyz. Biz eksport mehanızmin, onyń ishinde «Eýrazııalyq agroekspress» jobasy aıasynda belsendi túrde damyta alamyz jáne damytýǵa tıispiz. Atalǵan jobanyń iske qosylǵanyna kóp bolǵan joq. Bir jylǵa jetpeıdi. Az ýaqyt ishinde jedeldetilgen temirjol tasymalynyń arqasynda 500 myń tonnaǵa jýyq júk jetkizildi», - dedi ol.
Onyń aıtýynsha, jobaǵa jańa elderdi qosý jáne Qytaıǵa jetkizýge qoıylǵan shekteýlerdi alyp tastaý múmkindigi qarastyrylýda. Komıssııa tıisti usynystardy engizdi.
Spıkerdiń sózinshe, bul aýylsharýashylyq taýar óndirýshileriniń eksporttyq áleýetin keńeıtý máselelerin sheshýge aıtarlyqtaı úles qosady.
«Endi ortaq energetıkalyq naryqtardy qalyptastyrý ustanymdaryna keler bolsaq, biz muny eýrazııalyq ıntegratsııanyń damýynyń negizgi elementi dep sanaımyz. Ásirese qazir, jahandyq týrbýlenttilik jaǵdaıynda kóptegen elder energııa resýrstarynyń tapshylyǵyna tap bolyp otyr. Biz múshe memleketterdiń ishki qajettiligin qanaǵattandyryp qana qoımaı, múddeler tepe-teńdigi negizinde dos elderge kómektese alamyz», - dep qosty ol.
Sondaı-aq elektr energııasyn jetkizý qyzmetine qoljetimdilik erejeleri bekitildi. Bul qujat Odaq aıasynda elektr energııasynyń saýdasy kezinde qýattardy memleketaralyq tasymaldaýǵa ortaq naryqqa qatysýshylardyń ulttyq kemsitýsiz qoljetimdiligin qamtamasyz etedi.
EAEO-ǵa múshe memleketterdiń ekonomıkasyn tsıfrlandyrý boıynsha belsendi jumys jalǵasýda. Zamanaýı tehnologııalar, zamanaýı sheshimder bıznes úshin qosymsha múmkindikter ashady, syrtqy ekonomıkalyq salada qajetsiz bıýrokratııadan aýlaq bolýǵa múmkindik beredi.
«Eýrazııalyq bestiktegi áriptestermen kezdesý jaqsy ótti. Qabyldanǵan barlyq sheshimder, eń aldymen, ekonomıkanyń barlyq salalaryndaǵy praktıkalyq yntymaqtastyqty jandandyrýǵa baǵyttalýy tıis ekendigin bári jaqsy túsinedi. Odaqqa múshe árbir memleket eýrazııalyq ıntegratsııany damytý mindetine jaýapkershilikpen qaraıdy. Áriptesterdiń Reseı Federatsııasynyń Prezıdenti Vladımır Vladımırovıch Pýtın belgilegen basymdyqtardy júzege asyrý úshin birlesip jumys isteıtinin kórip otyrmyz», - dep túıindedi sózin ol.
Eýrazııalyq ekonomıkalyq komıssııa Alqasynyń tóraǵasy Mıhaıl Mıasnıkovıch bir jyl ishinde komıssııa 57 halyqaralyq shart pen aktini qabyldaýy tıis ekenin atap ótti.
Olardyń basym bóligi Odaq ıntegratsııasyn damytýdyń 2025 jylǵa deıingi strategııalyq baǵyttaryn iske asyrýdy qamtamasyz etedi.
Mıhaıl Mıasnıkovıch daıyndalyp jatqan qujat boıynsha konstrýktıvti pikir almasý bolǵanyn tilge tıek etti.
«Árıne, syrtqy saýdada qıyndyqtar bar, biraq olar negizinen ózara saýdanyń ósýi esebinen óteledi. Ósim 13,4 paıyzdy qurady», - dedi ol.
