Mıhaıl Kýkýshkın Ulybrıtanııadaǵy týrnırdiń shırek fınalyna ótti
NUR-SULTAN. QazAqparat – Qazaqstandyq Mıhaıl Kýkýshkın jekeleı synda Nottıngem (Ulybrıtanııa) chellendjer týrnıriniń shırek fınalyna shyqty, dep habarlaıdy QazAqparat tilshisi.
Dúnıejúzilik reıtıngte 166-orynda turǵan qazaqstandyq tennısshi ekinshi aınalymda álemniń 118-inshi, osy jarystyń 6-raketkasy, ıspanııalyq Fernando Verdaskomen sheberlik baıqasty.
Birinshi partııada M.Kýkýshkın basymdylyq tanytty – 6:3.
Ekinshi sette qarsylasy taı-breıkte sátti oınady – 7:6 (7:2).
Úshinshi, sheshýshi partııada esep 5:4 bolǵan mezette Mıhaıl taǵy bir breık jasaı bildi – 6:4.
Eki saǵat 23 mınýtqa sozylǵan tartysty match barysynda M.Kýkýshkın 2 eıs jasap, 3 breık-poıntty túgel paıdalana bildi. F.Verdasko 10 eıs, 1 breıkpen kózge tústi.
M.Kýkýshkın jartylaı fınalǵa shyǵý úshin álemniń 74-inshi, dodanyń 3-raketkasy, aýstralııalyq Djordan Tompsonmen talasady.
Qazaqstandyq sportshy juptyq synda da aýstralııalyq Djon Mıllmanmen birge shırek fınalǵa shyqqan edi.
Eske sala keteıik, budan buryn tennısten Qazaqstan balalar quramasynyń Azııa chempıonatynyń fınaldyq kezeńine shyqqanyn jazǵan bolatynbyz.
Sondaı-aq qazaqstandyq tennısshi Frantsııadaǵy jarystyń shırek fınalyna shyqty.
