Mıhaıl Kýkýshkın sporttyq mansabyn aıaqtaıtynyn málimdedi
ASTANA. KAZINFORM — Qazaqstandyq tennısshi, 38 jastaǵy Mıhaıl Kýkýshkın kásibı tennıstegi mansabyn aıaqtaıtyny týraly sheshim qabyldaǵanyn jarııa etti.
Tennısshiniń Instagram áleýmettik jelisindegi paraqshasynda málim etkenindeı, sońǵy jarysy bıylǵy qazanda ótetin Almaty Open ATP 250 týrnıri bolmaq.
M.Kýkýshkınniń aıtýynsha, tennıs eńbek nemese sport qana emes, onyń ómirine aınaldy. Bala kúninen bastap ol armandap, kúresti, utylysqa tózimmen qarap, jeńisti baǵalady, eshqashan berilmeýdi úırendi.
Osy jyldar ishinde baqytty sátter men ókinishter, jaraqattar men qaıta oralý, jarqyn tabystar men aýyr jeńilister – bári de boldy.
Sondaı uzaq joldan ótken tennısshi árdaıym qasynda bolǵan óziniń otbasyna, komandasyna, bapkerlerine, dostary men áriptesterine jáne jankúıerlerine alǵys aıtty.
- Qazan aıyna deıin ýaqyt bar. Áli de birneshe týrnır, jattyǵýlar kútip tur. Men sońǵy matchyma shyǵar kezde bar kúshimdi jumsaımyn, úlken armany bar bala kezimdegideı oıynnyń lázzatyna bólenemin. Bári úshin tennıske rahmet. Osynaý teńdessiz saıahattyń bir bóligi bolǵan sizdiń árqaısyńyzǵa rahmet. Qazanda kóriskenshe! – dep jazdy M.Kýkýshkın paraqshasynda.
Reseıdiń Volgograd qalasynda dúnıege kelip, alty jasynan tennıs raketkasyn ustaǵan Mıhaıl Kýkýshkın 2008 jyly Qazaqstan azamattyǵyn aldy.
M.Kýkýshkın sporttyq jolyndaǵy iri tabysy – 2010 jyly Sankt-Peterbýrg týrnırinde top jardy. Sondaı-aq 2014 jyly Azııa oıyndarynyń chempıony atanyp, Devıs kýbogy matchtarynda Qazaqstan namysyn qorǵady.
Eske sala keteıik, budan buryn Rolan Garrostan keıin Býblık úshin Shtýtgart týrnıri sátti bola ma, sony jazǵan edik.
Sondaı-aq Sonıa Jıenbaeva Qytaıdaǵy týrnırde jarystyń 1-raketkasyn jeńdi.
