Mıhaıl Kýkýshkın Portýgalııadaǵy jarystyń jartylaı fınalyna shyqty

ASTANA. KAZINFORM — Qazaqstandyq tennısshi, álemniń 134-raketkasy Mıhaıl Kýkýshkın Portý (Portýgalııa) chellendjer týrnıriniń jartylaı fınalyna joldama aldy

Jarystyń 3-raketkasy atanǵan qazaqstandyq sportshy shırek fınalda reıtıngide 678-orynda turǵan ıspanııalyq Aleks Martınestiń mysyn basty.

Tartystylaý órbigen birinshi partııa Kýkýshkınniń paıdasyna sheshildi – 6:4. Ekinshi sette Mıhaıl qarqynyn odan saıyn údetti – 6:1.

Bir saǵat 15 mınýtqa sozylǵan báseke barysynda Kýkýshkın 1 eıspen birge 5 breık-poınttan shashaý shyǵarǵan joq. Martınes 1 breıkten asa almady.

Mıhaıl Kýkýshkın fınalǵa shyǵý úshin álemniń 249-raketkasy, danııalyq Aýgýst Holmgrenmen talasady. A.Holmgren ekinshi aınalymda tartysty matchta taǵy bir qazaqstandyq Tımofeı Skatovty joldan taıdyrdy – 7:6 (8:6), 7:6 (7:5). Sodan keıin shırek fınalda frantsııalyq Artýr Reımondty qapy qaldyrdy – 6:2, 4:6, 6:3.

Eske sala keteıik, budan buryn Novak Djokovıchtiń Olımpıada tarıhynda jartylaı fınalǵa shyqqan eń jasy úlken tennısshi atanǵanyn jazǵan edik.