Mıhaıl Kýkýshkın Portýgalııadaǵy jarysta reseılikti qapy qaldyrdy

ASTANA. KAZINFORM — Qazaqstandyq, álemniń 195-raketkasy Mıhaıl Kýkýshkın Portý (Portýgalııa) chellendjer týrnırin jeńispen bastady.

Qazaqstandyq tennısshi alǵashqy kezdesýin reıtıngide 247-oryndaǵy reseılik Aslan Karatsevpen ótkizdi.

Birinshi partııada taı-breıkte Kýkýshkın tabandylyq tanytty — 7:6 (9:7).

Ekinshi sette oǵan jeńis úshin 1 breık jetkilikti boldy — 6:4.

Bir saǵat 45 mınýtqa sozylǵan básekede Kýkýshkın 7 eıspen birge 4 breık-poınttyń bireýin paıdalandy. Karatsev 10 eıspen kózge tústi.

Mıhaıl Kýkýshkın shırek fınalǵa shyǵý úshin álemniń 232-raketkasy, shvetsııalyq Elıas Imermen talasady.

Taǵy bir qazaqstandyq, reıtıngide 325-satydaǵy Denıs Evseev alǵashqy aınalymda álemniń 227-raketkasy, lıtvalyq Edas Býtvılaspen oınaıdy.

Eske sala keteıik, budan buryn Prezıdent kýbogynda Zańǵar Nurlanulynyń alǵash ret óner kórsetkenin jazǵan bolatynbyz.