Mıhaıl Kýkýshkın Nottıngem týrnıriniń ekinshi aınalymyna ótti
ASTANA. KAZINFORM – Qazaqstandyq, álemniń 247-raketkasy Mıhaıl Kýkýshkın Nottıngem (Ulybrıtanııa) chellendjer týrnıriniń ekinshi aınalymyna ótti.
Qazaqstandyq tennısshi alǵashqy kezdesýinde dúnıejúzilik reıtıngide 337-orynda turǵan kort ıesi Charlz Brýmdy joldan taıdyrdy.
M.Kýkýshkın 6:4, 7:6 (7:3) esebimen Ch.Brýmnyń meselin qaıyrdy.
Bir saǵat 50 mınýtqa sozylǵan tartysty báseke barysynda Kýkýshkın 5 eıspen birge 6 breık-poınttyń bireýin ǵana paıdalandy. Ulybrıtanııalyq sportshy 9 eıspen kózge tústi.
Mıhaıl Kýkýshkın shırek fınalǵa shyǵý úshin álemniń 194-raketkasy, belgııalyq Iorıs De Lore nemese reıtıngide 408-satydaǵy ulybrıtanııalyq Kaıl Edmýnpen (jeńgenimen) talasady.
Eske sala keteıik, budan buryn Anna Danılınanyń Ábý-Dabıde shırek fınaldan tys qalǵanyn jazǵan bolatynbyz.
