Mıhaıl Kýkýshkın qatarynan ekinshi ret chellendjer týrnırinde chempıon atandy

ASTANA. KAZINFORM — Qazaqstandyq, álemniń 165-raketkasy, 36 jastaǵy Mıhaıl Kýkýshkın Tenerıfe (Ispanııa) chellendjer týrnıriniń chempıony atandy.

Jarysty irikteý saıystarynan bastap, fınalǵa deıin jetken qazaqstandyq tennısshi sońǵy básekede álemniń 156-raketkasy, 22 jastaǵy ıtalııalyq Matteo Gıgantemen bas júldeni sarapqa saldy.

Qarsylastar matchty breık almasýmen bastady. Degenmen sodan keıin qos breıkke qol jetkizgen tájirıbeli M.Kýkýshkınniń basymdyǵy aıqyn kórinis tapty – 6:2.

Ekinshi sette de qazaqstandyq 2:0 esebimen alǵa ketti. Budan keıin M.Gıgante matchty jalǵastyrýdan bas tartty.

Bir saǵatqa jýyq ýaqytqa sozylǵan báseke barysynda M.Kýkýshkın 3 eıs jasap, 7 breık-poınttyń tórteýin paıdalandy.

Buǵan deıin Manama (Bahreın) chellendjer jarysynda úzdik shyqqan qazaqstandyq tennısshi osymen jeńis serııasyn 12 oıynǵa jetkizdi.

Osy tabysy arqasynda Mıhaıl Kýkýshkın ATP Live reıtıngisinde birden 140-orynǵa kóterilip tur.

Eske sala keteıik, budan buryn Mıhaıl Kýkýshkınniń qatarynan 11 matchynda jeńiske jetip, Ispanııada fınalǵa shyqqanyn jazǵan edik.

Sondaı-aq Dmıtrıı Popko Argentınadaǵy týrnırdiń fınalyna ótti.