Mıhaıl Kýkýshkın Italııadaǵy týrnırdiń fınalyna shyqty
ASTANA. QazAqparat – Qazaqstandyq, álemniń 223-raketkasy Mıhaıl Kýkýshkın Italııadaǵy Andrııa týrnıriniń fınalyna shyqty, dep habarlaıdy QazAqparat tilshisi.
Qazaqstandyq tennısshi jartylaı fınalda álemniń 98-inshi, osy jarystyń 1-raketkasy, majarstandyq Marton Fýchovıchpen sheberlik baıqasty.
Mıhaıl Kýkýshkın qarsylasyn 6:4, 6:4 esebimen tize búktirdi.
Bir saǵat 18 mınýtqa sozylǵan matchta Kýkýshkın eıs jasamaǵanymen, 11 breık-poınttyń tórteýin paıdalandy. M.Fýchovıch 2 eıs, 2 breıkpen kózge tústi.
M.Kýkýshkın fınalda álemniń 197-raketkasy, shveıtsarııalyq Leonardo Reıdımen bas júldeni sarapqa salady.
Óz sporttyq jolynda qazaqstandyq tennısshi jekeleı synda 14 ret chellendjer jarystarynyń jeńimpazy atandy. Sońǵy ret Mıhaıl 2018 jyly Irvıngte (AQSh) úzdik shyqty.
Eske sala keteıik, budan buryn Mıhaıl Kýkýshkınniń Italııadaǵy jarystyń jartylaı fınalyna ótkenin jazǵan bolatynbyz.
Foto: ktf.kz
