Mıhaıl Kýkýshkın Ispanııadaǵy jarysta qatarynan úshinshi jeńisine qol jetkizdi
ASTANA. KAZINFORM – Qazaqstandyq, álemniń 165-raketkasy Mıhaıl Kýkýshkın Tenerıfe (Ispanııa) chellendjer týrnıriniń ekinshi aınalymyna shyqty.
Qazaqstan tennısiniń ardageri atalmysh jarysty irikteý saıystarynan bastap, onda qos birdeı qarsylasyn utqan edi.
Negizgi dodada M.Kýkýshkın alǵashqy aınalymda dúnıejúzilik reıtıngide 200-orynda turǵan ıtalııalyq Franko Agamenonemen sheberlik baıqasty.
Qazaqstandyq sportshy eki saǵatqa jýyq ýaqytqa sozylǵan tartysty matchta qarsylasyn 7:6 (7:3), 6:3 esebimen qapy qaldyrdy. Ol 2 eıspen birge 6 breık-poınttyń úsheýin óz esebine jazdy. F.Agamenone 1 eıs, 2 breıkten (5 breık-poınt) asa almady.
Mıhaıl Kýkýshkın shırek fınalǵa ótý úshin reıtıngide 231-satydaǵy bolgarııalyq Dımıtar Kýzmanovpen talasady.
Tenerıfede qatarynan úsh jeńiske qol jetkizgen qazaqstandyq tennısshi qazirgi kezde ATP Live 160-orynǵa kóterilip tur.
Eske sala keteıik, budan buryn Aleksandr Býblık Dýbaı ATR 500 týrnıriniń ekinshi aınalymyna ótkenin jazǵan edik.
