Mıhaıl Kýkýshkın Frantsııadaǵy jarysta qarsylasyn qapy qaldyrdy

ASTANA. KAZINFORM — Qazaqstandyq tennısshi, álemniń 263-raketkasy Mıhaıl Kýkýshkın Lıll (Frantsııa) chellender týrnırinde negizgi jarysqa joldama aldy.

Qazaqstandyq sportshy irikteý saıysynyń fınalynda reıtıngide 293-oryndaǵy chehııalyq Gınek Bartonmen sheberlik baıqasty.

Birinshi partııada taı-breıkte chehııalyq tennısshi basymdylyq tanytty — 7:6 (7:5). Budan keıin Kýkýshkın oıyn tizginin qolyna alyp, kambek jasaı aldy — 6:2, 7:6 (7:3).

Eki saǵat 45 mınýtqa sozylǵan tartysty básekede 38 jastaǵy M.Kýkýshkın 4 eıs, 4 breıkpen (6 breık-poınt) kózge tústi. Barton 15 eıs jasap, 10 breık-poınttyń tek ekeýin paıdalandy.

Qazaqstandyq tennısshi irikteýdiń jartylaı fınalynda japonııalyq Djeıms Kent Trotterdi 7:6 (7:4), 4:6, 7:6 (7:4) esebimen jeńgen bolatyn. Bul kezdesý de tartysty ótip, 2 saǵat 40 mınýtqa sozyldy.

Lıll jarysynyń júlde qory 203,9 myń eýroǵa baǵalanǵan. Jeńimpaz 30 460 eýroǵa qosa 125 reıtıngilik upaıǵa qol jetkizedi.

Mıhaıl Kýkýshkınniń kelesi qarsylasy keıin belgili bolady.

Eske sala keteıik, budan buryn Anna Danılınanyń Doha týrnıriniń chempıony atanǵanyn jazǵan edik.

Dýbaı týrnırinde Elena Rybakına ótken jylǵy nátıjesin jaqsarta ala ma, sony da habarladyq.

Anna Danılına álemdik reıtıngide jeke rekordyna qol jetkizdi.