Mıhaıl Kýkýshkın Bahreındegi jarystyń kelesi aınalymyna ótti

ASTANA. KAZINFORM – Qazaqstandyq, álemniń 110-raketkasy Mıhaıl Kýkýshkın Manama (Bahreın) chellendjer týrnıriniń ekinshi aınalymyna shyqty.

Jarystyń 4-raketkasy bolyp tirkelgen qazaqstandyq tennısshi bastapqy kezdesýinde álemdik reıtıngide 427-orynda turǵan reseılik Evgenıı Karlovskııdiń mysyn basty.

Kýkýshkın 6:2, 6:3 esebimen jeńiske jetti. Bir saǵat 11 mınýtqa sozylǵan matchta ol 6 breık-poınttyń tórteýin paıdalandy. Karlovskıı 1 eıs, 1 breıkpen (3 breık-poınt) shekteldi.

Mıhaıl Kýkýshkın shırek fınalǵa shyǵý úshin reıtıngide 240-satydaǵy ıtalııalyq Andrea Vavassorımen sheberlik talastyrady.

Osy jarysta qazaqstandyq eki tennısshiniń joly bola qoımady.

Reıtıngide 266-satydaǵy Denıs Evseev tartysty matchta álemniń 178-raketkasy, kanadalyq Aleksıs Galarnoǵa ese jiberdi – 6:7 (1:7), 7:6 (9:7), 3:6.

Sondaı-aq álemniń 226-raketkasy Beıbit Juqaev alǵashqy aınalymda reıtıngide 324-satydaǵy reseılik Marat Sharıpovtan jeńilip qaldy – 4:6, 6:7 (4:7).

Degenmen B.Juqaev juptyq synda ýkraınalyq Vıtalıı Sachkomen birge shırek fınalǵa joldama aldy.

Taǵy bir qazaqstandyq, álemniń 88-raketkasy Aleksandr Shevchenko Delreı-Bıch (AQSh) ATP 250 týrnırinde reıtıngide 328-oryndaǵy amerıkalyq Maıkl Mmoǵa jol berdi – 5:7, 6:7 (5:7). M.Mmo irikteý saıystarynyń fınalynda Dmıtrıı Popkony da qapy qaldyrǵan edi.

Eske sala keteıik, budan buryn Elena Rybakınanyń Doha týrnıriniń úshinshi aınalymyna shyqqanyn jazǵan edik.

Sondaı-aq Aleksandr Býblık Marsel týrnırinde ótken jylǵy chempıonmen kezdesedi.