Mıhaıl Kýkýshkın álemdik reıtıngide birden 16 satyǵa joǵarylady

ASTANA. KAZINFORM — Kásibı tennısshiler qaýymdastyǵy (ATP) álem úzdikteriniń reıtıngisin jarııalady.

Dúnıejúzilik reıtıngini burynǵysha serbııalyq Novak Djokovıch bastasa, odan keıin ıspanııalyq Karlos Alkaras pen reseılik Danııl Medvedev tur.

Qazaqstannyń birinshi raketkasy Aleksandr Býblık 23-ornynda qalsa, Aleksandr Shevchenko 56-dan 57-ge, Denıs Evseev 177-den 178-ge syrǵydy. Beıbit Juqaev 191-den 189-ǵa aýysty.

Ótken aptada Nottıngem chellendjer týrnıriniń jartylaı fınalyna deıin jetken Mıhaıl Kýkýshkın birden 16 saty joǵarylap, 247-den 231-ge kóterildi. 

Juptyq synda alǵashqy úshtikte ózgeris joq: úndistandyq Rohan Bopanna, aýstralııalyq Mettıý Ebden jáne amerıkalyq Ostın Kraıchek ózgelerge des berer emes.

Qazaqstandyqtardan Aleksandr Nedovesov 48-den 49-ǵa, Andreı Golýbev 63-ten 69-ǵa tómendedi. 

Osy aptada Qazaqstannyń kóshbasshy tennısshileri Aleksandr Býblık pen Aleksandr Shevchenko Rotterdam (Nıderland) ATP 500 jarysynda baq synaıdy.

A.Býblık alǵashqy aınalymda reıtıngide 31-oryndaǵy horvatııalyq Borna Chorıchpen taǵy da júzdesedi.

Budan buryn qazaqstandyq tennısshi B.Chorıchti Monpele dodasynyń fınalynda utqan edi.

A.Shevchenkonyń qarsylasy da osal emes, álemniń 47-raketkasy, qytaılyq Chjan Chjıchjen.

Eger A.Býblık pen A.Shevchenko Rotterdamda tabysty óner kórsetse, reıtıngide kórsetkishterin jaqsartady.

Eske sala keteıik, budan buryn Elena Rybakınanyń álemdik reıtıngide tórtinshi orynǵa kóterilgenin jazǵan bolatynbyz.