Mıhaıl Kýkýshkın álemdik TOP-100 tennısshileriniń qataryna enýdi kózdep otyr
ASTANA. QazAqparat - Astanada ótip jatqan «Prezıdent Kýbogy - 2017» saıysynda top jarǵan jaǵdaıda Mıhaıl Kýkýshkınge ATR reıtıngi boıynsha álemniń úzdik 100 tennısshileriniń qataryna enýine jol ashylýy múmkin, dep habarlaıdy «QazAqparat» HAA tilshisi.
Bul týraly «Prezıdent Kýbogy - 2017» halyqaralyq týrnırine baılanysty ótken baspasóz máslıhaty barysynda Qazaqstan tennıs federatsııasynyń vıtse-prezıdenti Dıas Dosqaraev málim etti.
«Saıystyń júlde qorynan 225 myń AQSh dollary tigilip otyr. Buǵan deıingi Qazaqstanda ótken Prezıdent Kýboktarynda mundaı qomaqty soma tigilmegen. Týrnırde top jarǵan jaǵdaıda erler arasyndaǵy jeńimpazǵa 110 upaı, áıelder arasyndaǵy úzdik shyqqanǵa 100 upaı beriledi. Eger Mıhaıl Kýkýshkın top jarsa, oǵan osy saıystan keıin álemdik TOP-100 tennısshileriniń qataryna enýine jol ashylýy yqtımal», - deıdi Dıas Dosqaraev.
Mıhaıl Kýkýshkın ótken jyly uıymdastyrylǵan Prezıdent Kýbogy jarysyna jaraqatyna baılanysty qatysa almaı qalǵan edi. Odan bir jyl buryn, ıaǵnı 2015 jyly otandasymyz Reseıden kelgen Evgenıı Donskoıdy jeńip, jeńis tuǵyrynan kóringen. Álemniń úzdik tennısshileriniń reıtıngin baqylap otyratyn tennisportal.ru saıtynyń málimetine sáıkes, qazirgi ýaqytta Mıhaıl Kýkýshkın ATR reıtınginde 118 orynda.
«Ókinishke oraı, ótken jyly jaraqattanyp, týrnırge qatysa almaı qaldym. Bul joly barymdy salamyn. Jeńisten úmittimin», - dedi baspasóz máslıhatyna qatysqan Mıhaıl Kýkýshkın.
Eske sala ketsek, búgin Astanadaǵy Ulttyq tennıs ortalyǵynda «Prezıdent Kýbogy - 2017» halyqaralyq týrnıri bastaldy. Týrnırde álemniń 21 elinen 200 tennısshi ózara bas synaspaq. Olardyń arasynda álemdik reıtıngtiń úzdik júzdiginiń tennısshileri de bar.
