Mıhaıl Kýkýshkın AQSh-taǵy týrnırdi sátti bastady
ASTANA. QazAqparat – Álemniń 262-raketkasy, qazaqstandyq Mıhaıl Kýkýshkın Blýmfıld Hıls (AQSh) chellendjer týrnırin sátti bastady, dep habarlaıdy QazAqparat tilshisi.
Qazaqstandyq tennısshi bastapqy kezdesýin dúnıejúzilik reıtıngte 1104-orynda turǵan amerıkalyq Krıstıan Harrısonmen ótkizdi.
M.Kýkýshkın birinshi partııada aıqyn basymdylyq tanytty – 6:2. Áıtse de ekinshisinde taı-breıkte ese jiberdi – 6:7 (7:9). Degenmen úshinshi, sheshýshi sette jeńisti julyp aldy – 7:6 (7:5).
Úsh saǵat 13 mınýtqa sozylǵan tartysty báseke barysynda M.Kýkýshkın 5 eıs jasap, 11 breık-poınttyń tórteýin paıdalandy. Qarsylasy 8 eıs, 2 breıkpen (4 breık-poınt) kózge tústi.
Mıhaıl Kýkýshkın júlde qory 80 myń AQSh dollaryna baǵalanǵan dodanyń shırek fınalyna shyǵý úshin álemniń 218-raketkasy, frantsııalyq Djovannı Mpeshı-Perrıkarmen talasady.
Taǵy bir qazaqstandyq, reıtıngte 243-satydaǵy Beıbit Juqaevqa qıyndaý qarsylas tap boldy. Ol alǵashqy aınalymda álemniń 110-ynshy, jarystyń 1-raketkasy, aýstralııalyq Djeıms Dakvortqa jol berdi – 6:7 (2:7), 5:7.
Eske sala keteıik, budan buryn Aleksandr Býblıktiń 24 eıs jasap, Ýımbldondy jeńispen bastaǵanyn jazǵan bolatynbyz.
Sondaı-aq Ýımbldonda Elena Rybakına ekinshi aınalymǵa shyqty. Álemge áıgili tennısshi Rodjer Federer Elena Rybakınanyń bul jeńisine qol soqty.
Baspasóz máslıhatynda E.Rybakına birinshi sette amerıkalyq Shelbı Rodjerske nelikten ese jibergenin aıtty.
