Mıhaıl Kýkýshkın AQSh-taǵy týrnırde ekinshi jeńisine qol jetkizdi

ASTANA. KAZINFORM – Qazaqstandyq tennısshi, álemniń 166-raketkasy Mıhaıl Kýkýshkın Fınıks (AQSh) chellendjer týrnırine joldama aldy.

Qazaqstandyq tennısshi irikteý saıystarynyń fınalynda dúnıejúzilik reıtıngide 458-orynda turǵan slovenııalyq Bor Artnakpen sheberlik baıqasty. 

Birinshi partııada slovenııalyq sportshy 6:4 esebimen basym tústi. Degenmen osydan keıin Kýkýshkın oıyn tizginin óz qolyna ala bildi – 6:4, 6:2.

Eki saǵat 34 mınýtqa sozylǵan tartysty báseke barysynda Kýkýshkın 3 eıspen birge 12 breık-poınttyń teń jartysyn óz paıdasyna jazdy. Artnak 1 eıs, 4 breıkpen (8 breık-poınt) kózge tústi. 

Mıhaıl Kýkýshkınniń negizgi dodadaǵy qarsylasy keıin anyqtalady. 

Qazaqstannyń ekinshi, álemniń 98-raketkasy Aleksandr Shevchenko osy jarystyń alǵashqy aınalymynda kútpegen jerden reıtıngide 264-satydaǵy amerıkalyq Kolton Smıtten utylyp qaldy – 1:6, 5:7.

Eske sala keteıik, budan buryn Tımofeı Skatovtyń Grekııadaǵy chellendjer týrnıriniń ekinshi aınalymyna shyqqanyn jazǵan bolatynbyz.