Mıhaıl Kýkýshkın AQSh ashyq chempıonatynyń irikteý saıysyn jeńispen bastady
NUR-SULTAN. QazAqparat – Qazaqstandyq, álemniń 215-raketkasy Mıhaıl Kýkýshkın AQSh ashyq chempıonatynyń irikteý saıysyn jeńispen bastady, dep habarlaıdy QazAqparat tilshisi.
M.Kýkýshkın birinshi kezdesýin dúnıejúzilik reıtıngte 235-satyda turǵan argentınalyq Nıkolas Kıkermen ótkizdi.
Birinshi partııada qazaqstandyq tennısshi 6:3 esebimen basym tústi.
Mıhaıl ekinshi sette esep 2:2 bolǵan mezette taǵy bir breıkpen alǵa ketti. Alaıda N.Kıker tarazy basyn teńestirdi – 4:4. Taı-breıkte Nıkolas sátti oınaı bildi – 7:6 (7:4).
Úshinshi, sheshýshi partııada qazaqstandyq sportshy 3:0 esebimen alǵa shyqty. Taǵy bir breık – 4:0. Budan keıin N.Kıker matchty jalǵastyrýdan bas tartty.
Eki saǵat jarymnan astam ýaqytqa sozylǵan báseke barysynda M.Kýkýshkın 3 eıs jasap, 10 breık-poınttyń teń jartysyn paıdalandy.
M.Kýkýshkın irikteý saıystarynyń jartylaı fınalynda álemniń 124-raketkasy, ıspanııalyq, bıyl 39-ǵa tolatyn Fernando Verdaskomen kortqa shyǵady.
F.Verdasko alǵashqy oıynynda reıtıngte 162-oryndaǵy ıtalııalyq Djanlýka Magerdi joldan taıdyrdy – 7:6 (7:5), 6:3.
Eske sala keteıik, budan buryn Dmıtrıı Popkonyń AQSh ashyq chempıonatynyń irikteý saıysyn sátti bastaǵanyn jazǵan bolatynbyz.
