Mıhaıl Krınıtsyn WBC-tiń Azııalyq boks keńesiniń chempıondyq ataǵy úshin jekpe-jek ótkizedi
ALMATY. Tamyzdyń 7-si. QazAqparat /Erlik Erjanuly/- Qazaqstandyq boksshy Mıhaıl Krınıtsyn qyrkúıektiń 18-i kúni Tashkentte Búkilálemdik boks keńesiniń (WBC) Azııalyq boks keńesiniń bos turǵan chempıondyq ataǵy úshin reseılik Maksım Vlasovpen 12 raýndtyq jekpe-jek ótkizedi,
dep habarlaıdy QazAqparat.
Qaraǵandylyq bylǵary qolǵap sheberi áýesqoı boksta da ulttyq deńgeıdegi jáne halyqaralyq dárejedegi túrli týrnırde talaı márte top jarǵan. Kásipqoı boksshy bolýdy bala jastan armandaǵan ol úlken rıngtegi alǵashqy jekpe-jegin 2007 jyly jeltoqsannyń 14-inde ótkizip, jeńis toıyn toılady. Qyrkúıektiń 20-sy kúni 22 jasqa tolatyn Mıhaıl - «dinim - ıslam, ultym - gagaýyz, otanym - Qazaqstan» deıdi. German Tıtov jetekshilik etetin «HHІ ǵasyr» klýbynda jattyǵatyn ol Ál-Hattab degen búrkenshik atpen buǵan deıingi 12 kezdesýdiń toǵyzynda jeńiske jetip (beseýin nokaýtpen), ekeýinde teń túsip, bireýinde ǵana qarsylasyna ese jiberdi. 2008 jyly Samarada reseılik Roman Sımakovtan utyldy. Mıhaıldyń osy jolǵy qarsylasy buǵan deıin jeńilistiń aşy dámin tatpaǵan 76,2 kılá salmaqtaǵy reseılik Maksım Vlasov. Qyrkúıektiń 11-i kúni 24 jasqa tolatyn Maksım kásipqoı bokstaǵy tuńǵysh kezdesýin 2005 jyly sáýirdiń 21-i kúni ótkizgen. Osy ýaqytqa deıin 18 ret jekpe-jekke shyǵyp, onyń 9-yn nokaýtpen aıaqtaǵan samaralyq bul boksshy da chempıondyq ataqtan dámeli.
