Mıhaıl Kavelashvılı Grýzııa prezıdenti bolyp saılandy

ASTANA. KAZINFORM — Daýystardy sanaý qorytyndysy boıynsha Grýzııanyń altynshy prezıdenti bolyp bıliktegi «Grýzın armany — Demokratııalyq Grýzııa» partııasynyń kandıdaty, parlamenttiń burynǵy depýtaty Mıhaıl Kavelashvılı saılandy, dep habarlaıdy Kazinform-nyń menshikti tilshisi.

 300 saılaýshylar alqasynyń 224 múshesi Kavelashvılıge daýys berdi. Birinshi týrda jeńiske jetý úshin oǵan saılaýshylardyń úshten ekisiniń daýysyn alý kerek boldy. 

— Ortalyq saılaý komıssııasynyń hatshysy usynǵan nátıjeler boıynsha Mıhaıl Kavelashvılı prezıdent bolyp saılandy, - dedi OSK tóraǵasy Georgıı Kalandarıshvılı saılaýdyń qorytyndy hattamasyna qol qoıa otyryp. 

OSK hatshysy Georgıı Djavahıshvılıdiń aıtýynsha, prezıdenttik saılaýǵa barlyǵy 225 saılaýshy qatysty. Bir bıýlleten joıyldy. Grýzııanyń altynshy prezıdenti bes jyldyq merzimge saılandy jáne 29 jeltoqsanda ulyqtaý rásimi ótedi.

Mıhaıl Kavelashvılı — fýtboldan Grýzııa ulttyq quramasynyń burynǵy shabýylshysy jáne Grýzııa parlamentiniń úsh shaqyrylymynyń depýtaty.

Grýzııadaǵy prezıdent laýazymy — ókilettiligi shekteýli sımvoldyq tulǵa. Ol kimdi keshiretinin sheshe alady jáne zańdarǵa veto quqyǵyn paıdalana alady. Biraq ol halyqaralyq qatynastarda úkimettiń kelisimimen ǵana ókildik qyzmetin atqara alady.

Esterińizge sala keteıik, Grýzııada prezıdent alǵash ret halyqtyń tikeleı daýys berýi arqyly emes, 300 tańdaýshydan turatyn kolledj otyrysynda saılandy. 

Buǵan deıin Grýzııadaǵy prezıdenttik saılaýda daýys berý qalaı ótip jatqanyn jazǵan edik.