Mıhaıl Gýsman: Kásibılik jaǵynan TASS pen QazAqparat jýrnalısteri teń tur
«Qymbatty dostar, qurmetti áriptester. Shyn kóńilmen aıtarym, sizderdi júzjyldyq mereıtoımen quttyqtaý maǵan zor qýanysh syılaıdy, bul – men úshin úlken qurmet.
TASS agenttiginiń qyzmetkerleri bul mereıtoı mejesinen ótti. 1 qyrkúıekte arada eki aptadan soń biz 116-jyldyǵymyzdy atap ótemiz. Sondyqtan sizder bizge jaqynsyzdar, júzjyldyq tarıhy bar dostarmyz. Tek jas jaǵynan kishisizder. Al «QazAqparat» tilshileriniń barlyq jyldardaǵy jumysyndaǵy kásibıligi, ondaǵy jaýapkershiligi men adaldyǵyn aıtar bolsaq, osy tusta teń dárejedemiz. Biz – kásibı mamandarmyz, jumysymyzdyń qyr-syryn bilemiz, oǵan asa jaýapkershilikpen qaraımyz, kásibimizdi jaqsy kóremiz osy tusta da birdeımiz.
Uzaq jyldar boıy «QazAqparattaǵy» áriptestermen kásibı, shyǵarmashylyq, baılanystamyn, jeke tanyspyn. Soǵan qýanamyn. Sizderdiń eńbekterińizdi sheksiz qurmetteımin, aradaǵy dostyqty qatty baǵalaımyn», - dedi Mıhaıl Gýsman.
Ol Qazaqstanǵa kelip turatynyn, Memleket basshysynan suhbat alǵanyn atap ótti. «Ókinishke qaraı, biz jıi kezdese bermeımiz, biraq men úshin ár kezdesý – kóńil merekesi. Meni sizderdiń tamasha elderińiz, Qazaqstanmen tereń sezim baılanystyryp otyr. Qazaqstandy, qazaq halqyn óte jaqsy kóremin, elderińizge qýana baramyn. Qazaqstan kóshbasshylarymen myqty suhbat júrgizgenime baqyttymyn. Asa qurmetti Nursultan Ábishulymen birneshe ret kezdesip, ol kisiden suhbat aldym. Qazaqstan Prezıdenti Qasym-Jomart Toqaevtan da ıntervıý alǵanyma kóp ýaqyt ótken joq, árbir áńgimelesý kezinde maǵan jýrnalıst retinde ǵana qarap qoımaı, TASS agenttigine, týǵan elim Reseıge degen erekshe yqylasty baıqadym.
Meniń oıymsha, bizdi rasymen de úzilmes dostyq baılanystyryp otyr.
Sizderge, meniń barlyq áriptesterime amandyq tileımin. Pandemııadan birigip eńserip, kóp uzamaı dostyq nıetpen qaıta qaýyshý tilegin bildiremin.
Júzjyldyq mereıtoılaryńyz qutty bolsyn!», - dedi Mıhaıl Gýsman.
