«Mıhaıl Gorbachev óziniń ólimi jaıyndaǵy aqparatty joqqa shyǵardy» - respýblıkalyq basylymdarǵa sholý
***
Keshe Astanadaǵy Rıksos qonaq úıinde Memleket basshysy Nursultan Nazarbaevtyń tóraǵalyq etýimen Qazaqstan Respýblıkasynyń Prezıdenti janyndaǵy Sheteldik ınvestorlar keńesiniń 25-shi plenarlyq otyrysy bolyp ótti. Ol «Qazaqstan halyqaralyq saýda, logıstıka, iskerlik jáne qarjylyq haby» degen taqyrypqa arnaldy. Osy jaıt arqaý bolǵan maqala «Egemen Qazaqstan» gazetiniń sársenbilik sanynda «Qazaqstannyń qurlyqaralyq qatynastardaǵy qýaty» degen taqyryppen berilgen. Sonymen birge, plenarlyq otyrysty ashardaǵy kirispe sózinde Memleket basshysy Nursultan Nazarbaev Keńes quramynda bolǵan ózgeristerdi habarlady. Atap aıtqanda, Keńes músheligine «Reseı Jınaq banki» basqarmasynyń tóraǵasy German Gref, Qazaqstan tarapynan Premer-Mınıstrdiń birinshi orynbasary Serik Ahmetov, Úkimet basshysynyń orynbasarlary Qaırat Kelimbetov pen Erbol Orynbaev jáne Ekonomıkalyq damý jáne saýda mınıstri Baqytjan Saǵyntaev qabyldanǵan. Sondaı-aq Sheteldik ınvestorlar keńesiniń músheleri quramynda basqa da birqatar aýys-túıister oryn alǵan.
«Egemen Qazaqstan» gazetiniń jazýynsha, Túrik Respýblıkasynyń Premer-mınıstri Rejep Taıyp Erdoǵan BNews.kz agenttigine bergen suhbatynda Qazaqstan-Túrkııa yntymaqtastyǵynyń negizgi basymdyqtaryn kórsetip, túrki áleminiń bolashaǵy men búgini jaıynda, sondaı-aq Astanaǵa jasaıtyn saparynan qandaı nátıje kútetinin áńgimelep berdi. Oqyrmandar nazaryna atalǵan suhbat «Rejep Erdoǵan: Ortalyq Azııa Túrkııa syrtqy saıasatynyń strategııalyq ózegi» atty taqyryppen resmı emes aýdarmamen usynylyp otyr.
***
Goloşekınniń Qazaqstan ólkelik partııa komıtetiniń birinshi hatshysy qyzmetinen aýystyrylýyna jáne Qazaqstanǵa joǵary jaqtan belgili bir kómek arnasynyń burylýyna, qalyń buqaranyń jappaı qarsylyǵyn bildirgen basqa da aryz-shaǵymdardan bólek, qazaq halqynyń birtýar perzenti Turar Rysqulov pen Sovnarkom tóraǵasy Oraz Isaevtiń Stalınge joldaǵan hattarynyń da úlken yqpal bolǵany tarıhı shyndyq. Osy jáne asharshylyq aqtańdaqtaryna qatysty basqa da kóleńkeli jaıttar jóninde professor Tileý Kólbaevtyń «Alash aınasy» basylymyndaǵy «Genotsıdke kim kináli?» atty maqalasynda jan-jaqty berilgen.
Syzǵanov atyndaǵy Ulttyq ǵylymı hırýrgııa ortalyǵy elimizdegi eń bedeldi medıtsınalyq mekemelerdiń biri. Mekemeniń búgingi tynys-tirshiligi jóninde ortalyq dırektory Manas Seısembaevtyń suhbaty «Alash aınasy» gazetinde «Dat» aıdarymen jarııalanyp otyr. «Medıtsınalyq joǵary oqý oryndary sapaly maman daıarlaı almaı otyr» degen taqyryppen berilgen bul suhbatta Manas Ahmetjaruly el medıtsınasynda qordalanǵan máseleler tóńireginde oı tolǵaıdy.
***
Shyǵys Qazaqstan oblysyndaǵy Shemonaıha aýylynda balalar men muǵalimderdiń kóz aldynda jergilikti mektep qulaı bastady. Oqýshylar men oqytýshylar oqý jylyn aıaqtaý úshin jedel túrde basqa ǵımaratqa kóshirildi, dep habarlaıdy «Vremıa» gazeti «Shkolnyı zaval» taqyrybyndaǵy marterıalda. Basylymnyń málimetinshe, mektep ákimshiligi 2 apta buryn birinshi bolyp dabyl qaqqan kórinedi. Atalǵan nysandaǵy jaryqtardyń ulǵaıýyna baılanysty, mektep qabyrǵasynda bilim alý qaýipsiz bolmady. Mektep 1965 jyly salynǵan eken. Qabyrǵadaǵy jaryqtar 5-7 santımetrge deıin jetken. Oqý orny ǵımaraty 2009 jyly apatty bolyp tanylǵan, alaıda ondaǵy sabaqtar osy kúnge deıin jalǵasqan.
***
«Kazahstanskaıa pravda» basylymynyń búgingi sanynda «Mıhaıl Gorbachev oproverg slýhı o svoeı smertı» taqyrypta aqparat jazylǵan. KSRO Eks-prezıdenti M. Gorbachev ózińniń ólimi jaıyndaǵy aqparatty seısenbi kúni joqqa shyǵardy. «Barlyǵy jaqsy, qant deńgeıi tómendep keledi. Meniń ólimim jaıly aqparat taratyp joǵary gonorar alýǵa nıettiler sál qatelikke boı aldyrdy»,-deıdi Gorbachev «Novaıa gazeta» bas redaktorymen telefonmen sóılesken kezde.
