Mıhaıl Bortnık: Prezıdent sybaılas jemqorlyqqa qarsy kúres jóninde mańyzdy málimdeme jasady
«Búgin tarıhı oqıǵa boldy. Jańa saılanǵan Memleket basshysy, elimizdiń Prezıdenti Qasym-Jomart Kemeluly Toqaev halyq pen memleketke adal bolýǵa ant berdi. Onyń halyqqa arnaǵan sózinen Qazaqstannyń ár azamaty ózine aıtylǵan sózdi tabady. Men ashyq saıasat júrgizý, demokratııa, halyqqa qyzmet etýge qatysty sózderine erekshe toqtalǵym keledi. Sybaılas jemqorlyqqa qarsy kúres jóninde mańyzdy málimdeme jasaldy. Málimdeme áleýmettik saıasatty keńeıtý jáne problemalardy sheshýge baǵyttaldy. Memleket basshysynyń ultaralyq kelisimge erekshe nazar aýdarǵanyn atap ótkim keledi.
Memleket basshysy Qazaqstan kóp vektorly syrtqy saıasatqa berik qalatynyn atap kórsetti. Qazaqstan - alpaýyt elderdiń arasynda ornalasqan memleket. Bizdiń eldiń jetistikteri men qaýipsizdigi kóp jaǵynan kórshilermen qanshalyqty durys qarym-qatynastarda bolatynymyzǵa da baılanysty», - dedi M. Bortnık.
Senator Q. Toqaevtyń ekonomıkany damytýǵa, ulttyq valıýtanyń turaqtylyǵyna, turǵyndar, ásirese, jastar úshin jumys oryndaryn ashýǵa qatysty aıtqan sózderine de toqtaldy. Onyń pikirinshe, osynyń bári qazirgi álemde Qazaqstannyń turaqty damýyn qamtamasyz etýi tıis.
Eske sala keteıik, búgin Qasym-Jomart Toqaev Qazaqstan Respýblıkasynyń Prezıdentin ulyqtaý rásiminde halqyna adal bolýǵa ant berdi.
Avtor: Meırambek Baıǵarın
