Mıhael Shýmaherdiń jaǵdaıy jaqsaryp keledi
ASTANA. QazAqparat - «Formýla-1» klasyndaǵy avtokólikter jarysy boıynsha jeti dúrkin álem chempıony Mıhael Shýmaherdiń jaǵdaıy birtindep jaqsaryp keledi. Bul týraly onyń menedjeri Sabına Kem aıtty, dep habarlady ITAR-TASS.
Shýmaherdiń densaýlyǵyna baılanysty odan basqa ol eshteńe aıtpady. Alaıda menedjer burynǵy sportshynyń «birtindep esin jınap, aınalasynda bolyp jatqan qubylystardy sezetinin» atap ótti. «Demek, onyń jaǵdaıy jaqsarady degenge bizde senim bar», - dep qosty Kem.
Eske sala ketsek, Frantsııadaǵy Merıbelde 2013 jylǵy 29 jeltoqsanda taý betkeıinde shańǵy teýip júrgen Shýmaher qulap, basynan aýyr jaraqattanǵan bolatyn. 45 jastaǵy shabandoz sodan beri Grenobl gospıtaldarynyń birinde es-tússiz jatyr.
