Mıhael Shýmaherdiń emi úshin aıyna 500 myń eýro jumsalady
ASTANA. QazAqparat - Nemistiń áıgili avtosportshysy, jeti dúrkin álem chempıony, «Formýla-1» jarysynyń jeńimpazy Mıhael Shýmaherdiń emi úshin qomaqty qarajat jumsalsa da, sportshynyń densaýlyǵy áli de aýyr.
Frantsııanyń Le Parisien basylymy sportshynyń emi úshin 500 myń eýro jumsalatynyn jarııalady. «Mıhael sportta júrip 715 mıllıon eýro tabys tapty. Qazirde bul aqsha emine tolyqtaı jetkilikti. Alaıda, qazirdiń ózinde onyń otbasy arnaıy túrde tapsyryspen jasalǵan, túrli jabdyqpen jabdyqtalǵan Ferrari FXX Evoluzione kóligin 11,2 mıllıon eýroǵa satylymǵa shyǵardy. Bir jyl kólemindegi Shýmaherdiń fızıkalyq turǵydan jaǵdaıy ózgerissiz, bir qalypty. Áli de týystarymen sóılesip, óz betimen qozǵala almaıdy. Al salmaǵy bar-joǵy 45 keli. Bul onyń óz salmaǵynan 25 keli joǵaltqan. Eń ókinishtisi, sportshy áli kúnge aınalasynda ne bolyp jatqanyn túsinbeıdi», - dep jazady basylym.
Mıhael Shýmaherdiń menedjeri Sabına Kem osydan jeti aı buryn onyń jaǵdaıy jaqsaryp kele jatqandyǵyn aıtqan bolatyn. Biraq osydan keıin tilshilerge tuşymdy jaýap qaıtarmaı, tek jeltoqsan aıynda ǵana bul sózderiniń shyndyqqa janaspaıtynyn moıyndady.
Aıta keteıik, 46 jastaǵy nemis sportshysy 2013 jyly Frantsııanyń Merıbele taýly aımaǵynda shańǵy teýip júrip, qatty qulaǵan bolatyn. Saldarynan bassúıek-mı jaraqatyn alyp, mıynyń eki jartysharyna zaqym keldi. Búginde ol 2014 jyldyń qyrkúıeginen bastap, Jeneva ózeniniń jaǵasynda ornalasqan záýlim úıinde em-dom qabyldap jatyr, dep jazady sport.ru.
