Mıhael Shýmaher esin jıdy
ASTANA. QazAqparat - «Formýla-1» dodasynyń jeti dúrkin chempıony Mıhael Shýmaher esin jıdy jáne qazirgi ýaqytta Grenobldegi klınıkadan saýyqtyrý ortalyqtarynyń birine jetkizildi, dep habarlaıdy germanııalyq BAQ sportshynyń menedjeri Sabına Kemge silteme jasap.
"Mıhael saýyqtyrýdan ótý úshin CHU Grenoble klınıkasynan shyqty. Ol endi komada emes", - deıdi Kem.
Onyń sózine qaraǵanda, sportshynyń januıasy men týǵan-týystary barlyq dárigerlerge jáne medbıkelerge, Mıhaeldi taý shatqalynda ómirine arasha túsken qutqarýshylarǵa úlken alǵys aıtady.
"Onyń otbasy sonymen qatar Mıhaeldiń saýyǵyp ketýine tilektes bolǵan barsha qaýymǵa da rızashylyǵyn bildiredi. Sizder oǵan úlken kómek jasadyńyzdar. Bolashaqta onyń saýyǵýy qoǵamnyń qatysýynsyz ótetindikten, bul jaıtqa túsinistikpen qaraýǵa shaqyramyn", - delingen onyń BAQ-qa taratqan habarlamasynda.
