Mıgratsııalyq daǵdarys: Ispanııa koroli 19 jyldan keıin Seýtaǵa bardy
ASTANA. KAZINFORM – Ispanııa koroli VI Fılıpp pen patshaıym Letısııa jazdaǵy mıgratsııalyq daǵdarystan áli tolyq qalpyna kelmegen Seýta qalasyna bardy, dep habarlaıdy Euronews.
Bul – Ispanııa koroldik otbasy ókilderiniń Soltústik Afrıkadaǵy atalǵan anklavqa 2007 jyldan bergi alǵashqy joǵary deńgeıdegi sapary. Ol kezde Seýta men Melılıaǵa VI Fılıpptiń ákesi, burynǵy korol Hýan Karlos barǵan bolatyn.
Korol men patshaıymdy qala kóshelerinde myńdaǵan turǵyn Ispanııa týy men gúl ustap qarsy aldy. Alaıda jınalǵandardyń arasynda «Seýtaǵa qorǵanys qajet!» degen jazýy bar jeıde kıgen azamattar da boldy.
Bıyl jazda Marokkodan Seýtaǵa zańsyz ótýge tyrysqan mıgranttar sany 70 myńnan asqan. Daǵdarys kezinde 140-tan astam mıgrant qaza tapqan.
Koroldik jup qaza tapqandardy eske alyp, musylman zıratyna bardy.
Mıgratsııalyq daǵdarysty eńserý úshin Ispanııa bıligi áskerdi jumyldyrýǵa májbúr bolǵan. Osy kezeńde qalada tonaý, zorlaý jáne jappaı tártipsizdik oqıǵalary kúrt kóbeıgeni habarlandy.
Quqyq qorǵaý organdarynyń málimetinshe, Seýtadaǵy jaǵdaıdy áli tolyq turaqtandyrý múmkin bolmaı otyr.
Keıin Ispanııa men Marokko bıligi zańsyz kelgen mıgranttardyń basym bóligin elderine qaıtarý jóninde kelisimge qol jetkizdi. Alaıda daǵdarys eki el arasyndaǵy qarym-qatynasqa keri áser etti.
Marokko Seýta men Ispanııanyń taǵy bir anklavy Melılıaǵa qatysty egemendik talabyn saqtap otyr.
Seýta bıligi ótken jazdy qalanyń jańa tarıhyndaǵy eń kúrdeli kezeń dep baǵalady.
Sapar barysynda VI Fılıpp jergilikti bılikke qoldaý bildirip, daǵdarys saldaryn eńserý isine Ispanııa memleketiniń erekshe mán beretinin jetkizdi.
Aıta keteıik, buǵan deıin Ispanııanyń Seýta qalasynda shekarany zańsyz kesip ótken shamamen 13 myń mıgrant qalyp qoıǵany habarlanǵan bolatyn. Olardyń 2,1 myńǵa jýyǵy kámeletke tolmaǵandar ekeni aıtylǵan.
