Mıgranttar sanynyń ósýi el qaýipsizdigi úshin de salmaq salady - Qýanysh Sultanov
ASTANA. 27 aqpan. QazAqparat - Mıgranttar sanynyń ósýi el qaýipsizdigi úshin de ájeptáýir salmaq salatynyn esten shyǵarmaýymyz qajet.
Búgin Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine eńbek kóshi-qony máseleleri boıynsha ózgerister men tolyqtyrýlar engizý týraly» zań jobasyn talqylaý barysynda depýtat Qýanysh Sultanov osylaı málim etti.
Depýtattyń aıtýynsha, eńbek salasyndaǵy kóshi-qon máseleleri halyqaralyq, álemdik dárejedegi birden bir mańyzdy qubylystarǵa aınalyp otyr. «BUU Bas Assambleıasynyń 1990 jylǵy qararymen qabyldanǵan eńbek mıgranttarynyń jáne olardyń otbasy músheleriniń quqyn qorǵaý týraly halyqaralyq konventsııaǵa sáıkes, eńbek mıgranttary men olardyń otbasy músheleri óz memleketimen qosa qaı memleket bolsa da erkin túrde tastap ketýge quqyly. Olardyń bul quqy ulttyq qaýipsizdikti, qoǵamdyq tártipti, densaýlyq pen qoǵamnyń ónegeliligin qarastyratyn zańdardan bólek, eshbir shekteýge tán emes. Sondyqtan da, zań jobasynyń basty maqsaty mıgranttyq qozǵalystarynyń zańsyzdyǵyn tómendetý, olardyń maqsatyn anyqtaý jáne adam quqyǵyn buzbastan memleket úshin olardyń da qozǵalysyn tıimdi paıdalana bilý bolyp otyr», - deıdi Qýanysh Sultanov.
Bul rette jyldan jylǵa Qazaqstanǵa shetelden kelip, zańdy da, zańsyz jumys isteýshilerdiń sany artyp otyrǵanyn aıtqan depýtat, jahandyq úderisterdi eskere otyryp, bundaı lektiń tómendemeıtinin, kerisinshe óse túsetinin eske salyp ótti.
Onyń aıtýynsha, bul tabıǵı dúnıe, óıtkeni bolashaqtaǵy Qazaqstan ekonomıkasynyń órkendeı túsýi kórshiles jurtty qyzyqtyra túsýi ábden anyq.
«Alaıda, mıgranttar sanynyń ósýi el qaýipsizdigi úshin de ájeptáýir salmaq salatynyn esten shyǵarmaýymyz qajet. Іshki ister mınıstrliginiń málimeti boıynsha, 2011 jyly 1 mln. 400 myńǵa jýyq sheteldik tirkelgen. Keıbir jyldary bir rettik aktsııa tusynda nemese 4-5 aı kóleminde 170 myńǵa jýyq sheteldik zańdastyrylǵan. Mundaı naýqandyq shara kezinde sheteldikter úshin de, ózimiz úshin de yńǵaısyz ári qajetsiz jaıttar kóp týyndaıdy. Ásirese, dál osy naýqandar tusynda shaqyrylatyn adammen sybaılastyq baılanysqa túsý múmkindigi de artatyny belgili», - dedi Qýanysh Sultanov.
Sonymen qosa, depýtat elimizde eńbek etip, jalaqy alyp, bıýdjetke tıisti salyq tólemin ótemeıtin sheteldikterdiń de az emes ekenin atap ótti. Onyń aıtýynsha, syrtqy kóshi-qonǵa qosa kapıtaldyń syrtqy aǵynyn eskersek, bundaı kóshi-qonnyń ekonomıkalyq, qarjylyq qaýpi de baıqalady.
