Mıgranttar men bosqyndar adam saýdasynyń ońaı oljasyna aınalýda - sarapshy
Bul jaıynda Bakýdegi QazAqparat tilshisine Ázerbjaıjannyń Memlekettik kóshi-qon qyzmeti janyndaǵy Qoǵamdyq keńestiń tóraǵasy, «Haıat» gýmanıtarlyq qoldaý kórsetý qoǵamdyq birlestiginiń jetekshisi Azer Allahveranov aıtty.
Onyń aıtýynsha, Aýǵanstan bosqyndary Iranǵa baǵyt alady. Al bir bóligi Ázerbaıjan arqyly Eýropaǵa jetýge tyrysady. Soǵystan qajyǵan sırııalyqtar Túrkııaǵa aǵylýda. Afrıka elderiniń bosqyndary Batys Eýropaǵa jetýdi kózdeıdi. Mıgranttardy dittegen jerlerine jetkizýmen kásibı kontrabandashylar aınalyssa, ózge qylmystyq toptar bosqyndardy adam saýdasy úshin paıdalanady.
Mıgranttarǵa jaqsy ómir, joǵary jalaqy ýáde etip, odan keıin qujattaryn tartyp alady da, erkekterin jumysqa, jas áıelderin jynystyq quldyqqa salady. Balalar men jasóspirimderdi qaıyr tileýge májbúrleıdi.
«Kóshý nemese turmystyq máseleleri úshin aqsha usyný áleýetti qurbandy táýeldi adamǵa aınaldyrady. Zańsyz kelgen mıgrant adam saýdasymen aınalysatyn toptardyń negizgi nysany sanalady. Tipti, ol elge zańdy jolmen kelse de kezdeısoq jaıttarmen qylmystyq toptar qarmaǵyna túsip qalýy múmkin», - dedi ol.
Allahveranovtyń aıtýynsha, Ortalyq Azııa men Ońtústik Kavkaz óńirinen de adam saýdasynyń qurbanyna aınalǵandar jetedi.
«Ulttyq úkimetter tarabynan adam saýdasymen kúres salasynda júzege asyrylyp jatqan memlekettik saıasatty atústi qarap, zerdelep kórgenniń ózinde mundaı betalys damyp kele jatyr dep aıtýǵa bolady», - dedi sarapshy.
Onyń sózine qaraǵanda, halyqaralyq qylmystyq toptar álemniń túrli óńirindegi turaqsyzdyqtardy ózderiniń is-áreketterine tıimdi paıdalanady.
«Saqtalyp otyrǵan ekonomıkalyq daǵdarys, qarýly qaqtyǵystar jáne basqa da sebepter adam saýdasy problemasynyń damýyna jáne onyń ózge de pishimderiniń kórinis tabýyna jol ashady», - dedi Allahveranov.
