Mıgranttar kerýeni AQSh-tyń ońtústik shekarasyna qaraı bet aldy
ASTANA. KAZINFORM — Úshinshi álem elderinen, negizinen Gondýrastan kelgen mıgranttar kerýeni Meksıkanyń ońtústigi arqyly AQSh-tyń ońtústik shekarasyna bara jatyr, dep habarlaıdy Kazinform agenttiginiń menshikti tilshisi Zero Hedge basylymyna silteme jasap.
Ótken aptada AQSh-ta ótken aralyq saılaýda demokrattardyń jeńiske jetýi mıgranttar aǵynymen tuspa-tus keldi. Olar solshyl kózqarastaǵy jańa Kongress elge zańsyz kirýge múmkindik beredi dep úmittenedi.
Sondaı-aq zańsyz mıgranttar Demokratııalyq partııa ókilderi basqaratyn «kók shtattardan» qoldaý tabamyz dep úmittenedi degen boljam bar.
Sársenbi kúni AQSh Shekara qyzmetiniń basshysy Tom Homan demokrattar men Meksıka bıligine qatań eskertý jasady.
– Kongress pen Tehasta demokrattardyń yqpaly artýy múmkin. Biraq Aq úı respýblıkashyldardyń, onyń ishinde aıqyn respýblıkashyldardyń qolynda. Prezıdent Donald Tramp AQSh tarıhyndaǵy eń senimdi shekara qorǵanysyn qalyptastyrdy. Mıgranttar kerýeni shekaraǵa qansha jaqyndasa da, AQSh-qa kire almaıdy. Olar keri qaıtarylady nemese qylmystyq jaýapqa tartylady. Deportatsııa aldynda túrmege qamalyp, jazasyn óteıdi. Biz shekaranyń bir qarys jerin de bermeımiz. Onyń qaýipsizdigin qamtamasyz etemiz. Aq úıde shekarada qaıtadan beıbereketsizdik ornaýyna jol bermeıtin prezıdent Tramp otyr. Men de buǵan jol bermeımin, – dedi Tom Homan.
Homan Meksıka bıligin AQSh prezıdenti Donald Tramp sııaqty batyl qadam jasap, eldiń ońtústik jáne soltústik shekaralaryna ásker ornalastyrýǵa shaqyrdy. Onyń aıtýynsha, Meksıka zańnamasy el aýmaǵy arqyly tıisti vızasyz tranzıtpen ótýge tyıym salady. Sondyqtan mıgranttar bul eldiń zańyn da buzyp otyr. Osyǵan oraı Homan Meksıka bıligin kóshi-qon aǵynyn baqylaýdy kúsheıtýge úndedi.
10 qarashada Fox News telearnasyna bergen suhbatynda AQSh ishki qaýipsizdik mınıstri Markýeın Mallın elden zańsyz kelgen 3 600-ge jýyq mıgrant kún saıyn deportatsııalanatynyn málimdedi. Naýryzdan tamyzǵa deıin deportatsııalyq reıster sany 45 paıyz artqan. Al qyrkúıekte AQSh Joǵarǵy soty Tramp ákimshiligine mıgranttardy úshinshi elderge deportatsııalaý saıasatyn jalǵastyrýǵa ruqsat berdi. Osy sheshimnen keıin Gvatemala azamattary Afrıkadaǵy Esvatını men Gana sııaqty elderge jóneltildi. Bul týraly H áleýmettik jelisinde jarııalandy.
Buǵan deıin AQSh Lıberııaǵa alǵashqy deportatsııasyn júzege asyrǵanyn habarlaǵan bolatynbyz.
