Mıgranttar búligi: Los-Andjeleske taǵy 2000 ulttyq gvardııashy, 700 teńiz jaıaý áskeri jiberildi

ASTANA. KAZINFORM – AQSh prezıdenti Donald Tramp ákimshiligi bılik ımmıgratsııalyq qyzmet júrgizgen reıdterden keıin sherýshiler men qaýipsizdik kúshteri arasyndaǵy qaqtyǵys kezinde Los-Andjeleske 700 teńiz jaıaý áskerin jiberip jatqanyn rastady, dep habarlaıdy VVS. 

Keıin qalaǵa Ulttyq gvardııanyń taǵy 2 myń sarbazy jóneltilip jatqany belgili boldy.

Aq úıdiń joǵary laýazymdy sheneýniginiń AFP-ge habarlaýynsha, bul sheshim «federaldyq qyzmetkerler men ǵımarattarǵa qaýip-qaterdiń kúsheıýine jaýap retinde» qabyldanǵan. Onyń aıtýynsha, teńiz jaıaý áskeri qalaǵa jaqyn mańdaǵy «Kemp-Pendlton» teńiz pehotasy bazasynan jiberildi. 

Kalıfornııa gýbernatory Gevın Nıýom bul sheshimdi «aqylsyz» dep atady.

Eske sala ketsek, 6 maýsym kúni keshke Kalıfornııanyń ońtústigindegi Los-Andjeleste ICE ımmıgratsııalyq qyzmetiniń aýqymdy reıdterine baılanysty narazylyq sherýleri bastaldy.

AQSh-tyń birneshe qalasynda prezıdent Donald Tramptyń zańsyz ımmıgratsııamen kúresý jónindegi aýqymdy naýqany aıasynda mıgranttardy ustaý reıdteri ótip jatyr. 

8 maýsymda narazylyq bildirýshilerdiń qaqtyǵysynan keıin Tramp Los-Andjeleske Ulttyq gvardııany jiberdi.