«Mıgrant» jedel-saýyqtyrý sharasy qolǵa alynǵan 5 kúnniń ishinde 15 myń sheteldik ákimshilik jaýapqa tartyldy
ASTANA. Qarashanyń 9-y. QazAqparat /Aıdar Ospanalıev/ - «Mıgrant» jedel-saýyqtyrý sharasy qolǵa alynǵan 5 kúnniń ishinde 15 myń sheteldik ákimshilik jaýapqa tartyldy. Olardyń 847-si - alys shet elderden kelgender.
Bul málimettermen jýrnalısterdi Іshki ister mınıstrliginiń Til saıasaty jáne aqparat departamentiniń bastyǵy Qýanyshbek Jumanov aptalyq brıfıngte tanystyrdy, dep habarlaıdy QazAqparat.
Onyń aıtýynsha, shara aıasynda 1 myń 92 sheteldik elimizdiń aımaǵynan alastatylyp, qujattary joq 1 myń 567 azamat arnaıy qabyldaý oryndaryna ornalastyrylǵan. Sondaı-aq kóshi-qon zańdaryn buzǵany úshin 30 qylmystyq s qozǵalyp, sheteldik jumys kúshin tartý jáne olardy paıdalaný tártibin buzǵan elimizdiń 394 azamaty tártiptik jaýapqa tartylǵan. «Bul rette aıta ketetin másele, operatsııa barysynda tek Astana men Almatynyń ózinen 2 myń 718 kóshi-qon zańdaryn buzýshylar anyqtaldy. Al jyl basynan beri kósh-qon tártibin buzǵan 133 myń azamat ákimshilik jaýapqa tartyldy», dedi departament bastyǵy.
Esterińizge sala keteıik, «Mıgrant» operatsııasyn tártip saqshylary Іshki ister mınıstriniń arnaıy buıryǵy negizinde elimizge keletin sheteldikterdiń júrip-turý áreketterin qatań baqylaýǵa alý maqsatynda uıymdastyrdy. Atalmysh sharaǵa
10 myńnan astam tártip saqshylary men quzyrly memlekettik organ ókilderi tartylyp otyr.
