«Mıgrant» jedel aldyn alý is-sharasynyń birinshi kúninde kóshi-qon polıtsııasynyń qyzmetkerleri 207 sheteldik azamatty ustady

Olardyń basym kópshiligi Qyrǵyzstan men Ózbekstan azamattary. Bul týraly Astana qalalyq ishki ister departametiniń til saıasaty jáne aqparat bóliminen habarlady.

Sonymen qatar reıd barysynda 129 azamattyń Qazaqstan Respýblıkasy aýmaǵynda bolý merzimi qysqartylyp, 11-i elden shyǵaryldy. Al 45 azamat qabyldaý-taratý ornyna qamalsa, taǵy 87-si sheteldik azamattardyń kelý erejesin, sheteldik jumys kúshterin tartý jáne paıdalaný erejesin buzǵandyǵy, sondaı-aq qujatsyz jáne tirkeýsiz turyp jatqandyǵy úshin ákimshilik jaýapkershilikke tartyldy.

Qazirgi ýaqytta Qyrǵyzstan men Tájikstan azamattaryna memlekettik shekarany kesip ótken kúnnen bastap 5 kúnniń ishinde ishki ister organdarynda tirkelýi qajet. Buǵan deıin atalǵan elderdiń azamattaryna QR Іshki ister mınıstrligi, Ulttyq qaýipsizdik komıteti jáne Syrtqy ister mınıstrlikteriniń shekaralyq baqylaý beketteri arqyly ótken sheteldik azamattardy tirkeý erejesin bekitý týraly birlesken buıryǵyna sáıkes tirkeý protsedýralary jeńildetilgen bolatyn. Máselen Qazaqstan aýmaǵynda Qyrǵyzstan azamaty ishki ister organdarynda tirkelmeı-aq 90 kún, al Tájikstan azamattary 30 kún júre alatyn.