«Mıgrant» operatsııasy: 7 myńnan astam quqyq buzýshylyq anyqtaldy
ASTANA. KAZINFORM – Qazaqstanda «Mıgrant» jedel-profılaktıkalyq is-sharasynyń qorytyndysy shyǵaryldy, dep habarlaıdy Polisia.kz.
Іshki ister mınıstrliginiń málimetinshe, qoǵamdyq tártipti qamtamasyz etý jáne kóshi-qon zańnamasyn buzýdyń aldyn alý maqsatynda respýblıka kóleminde ótkizilgen shara barysynda 7 myńnan astam quqyq buzýshylyq anyqtalǵan.
Atap aıtqanda, 4,1 myń shetel azamaty elde bolý qaǵıdalaryn buzǵany úshin ákimshilik jaýapkershilikke tartylǵan. Sonymen qatar 2,7 myń shetel azamaty zańsyz eńbek qyzmetin júzege asyrǵany úshin jaýapqa tartyldy.
Budan bólek, 2,2 myń qazaqstandyq pen zańdy tulǵa sheteldikter týraly polıtsııany ýaqytyly habardar etpegeni úshin jaýapkershilikke tartyldy. Al 500-den astam jumys berýshi sheteldik jumys kúshin zańsyz paıdalanǵany úshin jazalanǵan.
Salynǵan aıyppuldardyń jalpy somasy 200 mln teńgeden asty.
Vedomstvo dereginshe, kóshi-qon zańnamasyn buzǵan nemese Qazaqstan aýmaǵynda bolý negizderi joıylǵan 1,5 myń shetel azamatynyń elde bolý merzimi qysqartyldy. Sondaı-aq 1,2 myń adamdy elden shyǵarý týraly sot sheshimi qabyldanǵan.
121 shetel azamaty májbúrli túrde elden shyǵaryldy. Olardyń ishinde 8-i destrýktıvti-radıkaldy aǵym ókilderi ekeni anyqtalǵan. Elden shyǵarylǵan barlyq azamatqa Qazaqstanǵa 5 jylǵa kirýge tyıym salyndy.
Іs-shara barysynda barlyǵy 24 qylmystyq is qozǵaldy. Onyń ishinde 9 is memlekettik shekarany zańsyz kesip ótý faktisi boıynsha, 9 is zańsyz kóshi-qondy uıymdastyrý boıynsha jáne 6 is sheteldik jumys kúshin tartý qaǵıdalaryn buzý boıynsha tirkelgen.
ІІM quqyq buzýshylyqtardy taldaý nátıjesinde kóp jaǵdaıda zań buzýǵa Qazaqstan azamattarynyń ózderi yqpal etetinin atap ótti. Negizgi sebep – zańsyz ári jyldam paıda tabýǵa umtylý.
Máselen, Shymkent qalasynda, Almaty, Jambyl jáne Shyǵys Qazaqstan oblystarynda sheteldik jumys kúshin zańsyz tartý derekteri birneshe ret tirkelgen. Osy faktiler boıynsha Qylmystyq kodekstiń 395-baby 1-bóligi boıynsha sotqa deıingi tergep-tekserý bastaldy.
Sonymen qatar óńirlerdiń birinde Qazaqstan azamaty jalǵan qujattar arqyly shetel azamattaryn zańdastyrǵany anyqtaldy. Bul derek boıynsha Qylmystyq kodekstiń 394-baby negizinde tergeý júrgizilýde.
Іs-shara barysynda izdeýde júrgen 22 shetel azamaty ustaldy. Atap aıtqanda, Almaty qalasynda, Mańǵystaý, Túrkistan jáne Jambyl oblystarynda kórshi memleketter izdestirgen túrli qylmysqa qatysy bar azamattar qolǵa túsken.
Quqyq qorǵaý organdary kóshi-qon zańnamasynyń buzylýyn anyqtaý jáne aldyn alý boıynsha jumystardy jalǵastyryp jatyr.
Aıta keteıik, Almatyda kóshi-qon zańnamasyn buzǵan 132 sheteldik el aýmaǵynan shyǵaryldy.
