«Mıgrant» operatsııasy: kóshi-qon zańnamasyn buzýdyń 9 213 deregi anyqtaldy
Operatsııa barysynda kóshi-qon zańnamasyn buzýdyń 9 213 deregi anyqtaldy. Onyń ishinde 5 113-i sheteldikterdiń elimizde bolý merzimderin buzýyna qatysty. Sheteldikterdiń zańsyz eńbek qyzmetin júzege asyrýynyń 2 741 faktisi anyqtalyp, 471 jumys berýshi sheteldik jumys kúshin zańsyz paıdalanǵany úshin ákimshilik jaýapkershilikke tartyldy. Mysaly, Almaty, Atyraý qalalarynyń qurylys nysandarynda zańsyz jumys istegen 145 sheteldik anyqtaldy. Osyǵan uqsas faktiler Astana, Shymkent qalalarynda, Túrkistan jáne Shyǵys Qazaqstan oblystarynda tirkeldi.
Sonymen qatar, Almaty, Shymkent, Atyraý jáne Pavlodar oblystarynda sheteldik jumys kúshin birneshe ret zańsyz tartqan jumys berýshiler anyqtalyp, olarǵa qatysty Qazaqstan Respýblıkasy Qylmystyq kodeksiniń 395-babynda kózdelgen qylmys belgileri boıynsha sotqa deıingi tergeý bastaldy. Olarda bolǵan sheteldikter týraly polıtsııaǵa ýaqtyly habarlamaǵany úshin 3 631 jeke jáne zańdy tulǵa jaýapqa tartyldy.
Kóshi-qon zańnamasyn buzýshylardy elimizden tys jerge shyǵarý týraly 674 sot sheshimi shyǵaryldy. Qoǵamdyq tártipti buzýyna baılanysty birneshe ret quqyq buzýshylyq jasaǵany úshin azamattyq sot óndirisi sheńberinde 62 sheteldikke qatysty elden tys jerge shyǵarý týraly sheshim qabyldandy. 145 sheteldik májbúrli túrde elden tys jerge shyǵaryldy. Olardyń barlyǵyna 5 jylǵa deıin Qazaqstanǵa kelýge tyıym salyndy.
Óz elinde qylmys jasaǵany úshin izdeýde júrgen 22 sheteldik ustaldy. Reıdter ótkizý kezinde Jambyl oblysynda UQK-niń Shekara qyzmetimen birlesken árketterdiń nátıjesinde elimizge zańsyz kelgen Pákistannyń 9 azamaty ustaldy. Almaty qalasynda 2022 jylǵy qarashada ótkizý pýnktinen tys memlekettik shekarany zańsyz kesken Qyrǵyz Respýblıkasynyń azamaty anyqtaldy. Osy faktiler boıynsha, sondaı-aq zańsyz kelýshilerge baspana usynǵan adamdarǵa qatysty sotqa deıingi tergeý júrgizilip jatyr.
Sonymen qatar, operatsııa barysynda polıtsııa qyzmetkerleri qandaı da bir sebeptermen jeke basty kýálandyratyn qujattardy ala almaǵan adamdardy qujattandyrýǵa kómek kórsetti. Osylaısha, 53 jyl boıy qujatsyz júrgen 1970 jyly týǵan Atyraý turǵyny jeke kýálik aldy. Mundaı kómek sondaı-aq Almaty qalasynda, Qyzylorda jáne Túrkistan oblystarynda kórsetildi.