Mıgratsııalyq dúrbeleń ınflıatsııany ýshyqtyrdy - Ulttyq bank
«Inflıatsııa jyldyq mánde 17,7%-ǵa jetti. 22,2%-ǵa deıin jedeldegen azyq-túlik ónimderi baǵasynyń ósýi ınflıatsııaǵa eń kóp úles qosýda. Azyq-túlik ınflıatsııasy qurylymynda jumyrtqa, ósimdik maılary, qus eti, nan-toqash ónimderi, jarma men sút ónimderi baǵasynyń barynsha óskeni baıqalady. Al jemis-kókónis ónimderi baǵasynyń maýsymdyq tómendeýi belgili bir dezınflıatsııalyq yqpal etti.
2022 jylǵy qyrkúıekte azyq-túlikke jatpaıtyn taýarlar ınflıatsııasy 17,0%-ǵa deıin jedeldedi. Jıhaz, jýý jáne tazalaý quraldary, úı sharýashylyǵyn júrgizýge arnalǵan taýarlar, kómir, otyn jáne aıaq kıim quny da aıtarlyqtaı ósti», - dedi Ǵalymjan Pirmatov.
Onyń sózine qaraǵanda, tutyný baǵasynyń jyldyq ósimi qyrkúıek aıynda 26,8%-ǵa deıin jedeldegen.
«2022 jylǵy qyrkúıek aıynda aqyly qyzmet kórsetý baǵasynyń jyldyq ósý qarqyny 12,3%-ǵa jetti. Turǵyn úı jaldaý, bilim berý, turǵyn úı-kommýnaldyq sharýashylyǵy qyzmetteriniń jekelegen túrleri qunynyń ósýi de ınflıatsııaǵa negizgi úles qosty.
Qyrkúıekte bazalyq ınflıatsııa 19,7%-ǵa jetip, jyldyq ınflıatsııanyń turaqty ósýin kórsetti. Bul taýarlar men qyzmetter baǵasynyń joǵary qarqynmen ósýin rastaıdy.
Tutyný baǵasynyń jedel qarqynmen ósýi barlyq kórsetkishter boıynsha baıqalýda. Máselen, sońǵy aılarda maýsymdyq faktordy eskermegendegi ınflıatsııa turaqty ósýde. Onyń jyldyq mánge keltirilgen kórsetkishi shilde aıynda 17,7%-ǵa deıin baıaýlaǵannan keıin tamyz aıynda 23,2%-ǵa deıin ósti, qyrkúıek aıynda 26,8%-ǵa deıin jedeldedi.
Bıylǵy qyrkúıek aıynda aldaǵy bir jylǵa kútiletin ınflıatsııany medıandyq baǵalaý 16,9% boldy. Respondentter muny azyq-túlik pen janar-jaǵarmaı baǵasynyń ózgerýine, syrtqy oqıǵalarǵa, sondaı-aq aıyrbastaý baǵamynyń ózgerýine baılanystyryp otyr. Bul óziniń ýaqytsha sıpatyna qaramastan ınflıatsııalyq kútýlerge aıtarlyqtaı yqpal etetin mıgratsııalyq shok sebebinen oryn alýda», - dedi Ulttyq bank tóraǵasy.
