Mıgratsııa esebinen Astanada zeınetaqy men ótemaqy alýshylar sany artyp barady
ASTANA. QazAqparat - Ýrbanızatsııanyń kúrt belsendiliginiń áserinen Astanada zeınetaqy men ótemaqy alýshylar kóbeıip jatyr. Bul týraly búgin QR Densaýlyq saqtaý jáne áleýmettik damý mınıstrligi Zeınetaqy tóleý boıynsha memlekettik ortalyǵynyń astanalyq fılıalynyń basshysy Oljabaı Beısenbaev málim etti.
«Búginde Astana xalqynyń sany 800 myńnan asady. Azamattar sany kúrt kóbeıip jatqandyqtan, zeınetaqy men ótemaqy alýshylardyń sany joǵarylaýda. Sońǵy jyldary zeınetkerler sany 4863 adamǵa ulǵaıdy. Kórip otyrǵanymyzdaı, mıgratsııalyq aǵynnyń kúsheıýinen zeınetaqy men ótemaqy alýshylar kóbeıgen. Máselen, 2011 jyly - 4166, 2012 jyly - 5281, 2013 jyly - 3696, 2014 jyly - 3318 zeınetaqy men ótemaqy alýshylar tirkeldi», - dedi ol «Jańarý» jemqorlyqqa qarsy qozǵalysynyń qoǵamdyq tyńdaýynda. Aıta ketý kerek, 2015 jyldyń 1 qazanyndaǵy derekter boıynsha, ZTMO Astana qalalyq fılıaly 226 124 adamǵa zeınetaqy men ótemaqy berip keledi. Olardyń 66 786 zeınetaqy alýshylar bolsa, qalǵany memlekettik ótemaqy alýshylar.
