MıG-31 ushaǵynyń apatqa ushyraýyn tekserý boıynsha memlekettik komıssııa quryldy

ASTANA. 25 sáýir. QazAqparat - MıG-31 ushaǵynyń apatqa ushyraýyn tekserý boıynsha memlekettik komıssııa quryldy.

Bul týraly búgin QR Qorǵanys mınıstrliginde ótken brıfıng barysynda QR QK Áýe qorǵanysy kúshteriniń Bas qolbasshysy, avıatsııa general-leıtenanty Aleksandr Sorokın málim etti.

«Qazirgi kezde QR Qorǵanys mınıstriniń buıryǵymen memlekettik komıssııa quryldy»,- dedi ol.

A.Sorokınniń atap ótýinshe, MıG-31 ushaǵyna kúrdeli jóndeý jasaǵan Rjev qalasyndaǵy avıajóndeý zaýytynyń mamandary, RF ushý qaýipsizdigi qyzmetiniń mamandary jáne RF Avıatsııa ónerkásibi mınıstrliginiń ókilderi shaqyrylǵan.

«Olar bizdiń memlekettik komıssııamen birlesip, avıatsııalyq apattyń sebep-saldaryn tekseredi. Komıssııa jumysynyń nátıjeleri týraly, apattyń sebepteri jaıly qosymsha habarlanady», - dedi Bas qolbasshy.