MıG-31 apatyna jaýapty reseılik zaýytta otandyq taǵy úsh ushaq kúrdeli jóndeýden ótýde

ASTANA. 25 sáýir. QazAqparat - «MIG-31B» ushaǵynyń apatyna jaýapty Rjevsk qalasyndaǵy «514-m» avıajóndeý zaýytynda Qazaqstannyń taǵy úsh ushaǵy kúrdeli jóndeýden ótip jatyr.

Bul týraly búgingi baspasóz-máslıhatynda QR Qarýly Kúshteri Áýe qorǵanysy kúshteriniń Bas qolbasshysy Aleksandr Sorokın málim etti.

Onyń aıtýynsha, Qaraǵandynyń túbinde apatqa ushyraǵan «MIG-31B» ushaǵyna Rjevsk qalasyndaǵy «514-m» avıajóndeý zaýyty jaýapty. Sebebi sol ushaqty kúrdeli jóndeýden ótkizgen zaýyt onyń durys jumys isteýine eki jyl kepildik bergen. «Búginde atalǵan zaýyttan bizge eki ushaq keldi. Oǵan qosa, taǵy úsh ushaq kúrdeli jóndeýden ótip jatyr», - dep atap kórsetti A.Sorokın.

Aıta keteıik, búginde «MIG-31» úlgisinde ushaqtar tek Reseı men Qazaqstanda ǵana bar. Áýe qorǵanysyna arnalǵan bul tehnıkanyń jyldamdyǵy saǵatyna 3 myń shaqyrymnan asady.