Microsoft JI-i kúrdeli aýrýlardy anyqtaýda 83% dáldik kórsetti
ASTANA. KAZINFORM – Microsoft kompanııasy kúrdeli aýrýlardy dıagnostıkalaýǵa arnalǵan jasandy ıntellekt júıesin tanystyrdy. Synaq barysynda júıe medıtsınalyq kúrdeli jaǵdaılardy 83% dáldikpen anyqtaǵan dep habarlaıdy Anadolu agenttigi.
Science ǵylymı jýrnalynda jarııalanǵan zertteýge sáıkes, Microsoft AI Diagnostic Orchestrator (MAI-DxO) júıesi kúrdeli klınıkalyq jaǵdaılardy taldaýda joǵary nátıje kórsetken. Salystyrý úshin medıtsınalyq anyqtamalyqtar men ınternet resýrstaryn paıdalanǵan dárigerler dıagnozdy 36% jaǵdaıda durys anyqtaǵan. Al qosymsha derekkózdersiz olardyń dáldigi 22% bolǵan.
Zertteýshiler tehnologııany The New England Journal of Medicine medıtsınalyq jýrnalynda jarııalanǵan 304 kúrdeli klınıkalyq jaǵdaı boıynsha synaqtan ótkizgen.
Júıe birneshe jasandy ıntellekt agentinen turady. Olar sımptomdardy birlesip taldap, yqtımal dıagnozdardy usynady, qajetti tekserýlerdi tańdaıdy jáne qorytyndy jasaıdy.
Jedel medıtsınalyq kómek bólimderinde kezdesetin jıi jaǵdaılardy teksergende de JI 80% dáldikke qol jetkizgen. Bul kórsetkish dárigerlerde 47% bolǵan.
Microsoft kompanııasynyń málimetinshe, jańa tehnologııa dıagnoz qoıý shyǵyndaryn azaıtýǵa da múmkindik beredi. Ol dáldikti saqtaı otyryp, tekserýler sanyn qysqartyp nemese arzanyraq protsedýralardy tańdaı alady. Júıeniń bir nusqasy 81% dáldik kórsetip, synaqtan ótken basqa júıelermen salystyrǵanda eseptik shyǵyndardy eki eseden astam azaıtqan.
Kompanııa bul nátıjelerdi kúrdeli dıagnostıkalyq mindetterdi oryndaı alatyn ári medıtsınalyq kómekti uıymdastyrýǵa járdemdesetin «medıtsınalyq sýperıntellekt» jasaý jolyndaǵy mańyzdy qadam dep baǵalaıdy.
Sonymen birge zertteý naqty medıtsınalyq tájirıbede emes, modeldengen klınıkalyq jaǵdaılarda júrgizilgen. Salystyrmaly synaqqa belgili bir salaǵa mamandanǵan dárigerler toby qatyspaǵan.
Tehnologııany odan ári baǵalaý úshin Microsoft Bostondaǵy Beth Israel Deaconess medıtsınalyq ortalyǵymen birlesken zertteý ótkizýdi josparlap otyr. Onda júıeniń dıagnostıkalyq múmkindikteri aýrýhana jaǵdaıynda dárigerlerdiń táýelsiz qorytyndylarymen salystyrylady.
Eske salaıyq, buǵan deıin Microsoft jasandy ıntellekt tapsyrmalaryn tıimdi oryndaýǵa arnalǵan Maia 200 jańa chıpin tanystyrǵan edi. Kompanııanyń málimetinshe, protsessor derekterdi óńdeý ortalyqtaryndaǵy ónimdilik pen shyǵyn araqatynasyn shamamen 30%-ǵa jaqsartady.
