Microsoft JI kómegimen 500 mıllıon dollardan astam qarjy únemdedi

ASTANA. KAZINFORM – Tehnologııalyq alpaýyt Microsoft kompanııasy ótken jyly Call-ortalyqtarynda jasandy ıntellektti (JI) qoldaný arqyly 500 mıllıon dollardan astam qarjy únemdegen. Bul týraly Bloomberg News deregine súıene otyryp, Report agenttigi habarlady. 

Ótken aptada kompanııa shyǵyndardy baqylaý maqsatynda jáne JI ınfraqurylymyna salynǵan iri ınvestıtsııalar aıasynda jumys kúshiniń shamamen 4 paıyzyn qysqartýdy josparlap otyrǵanyn málimdegen. Mamyr aıynda Microsoft 6 myńǵa jýyq qyzmetkerdi jumystan bosatqanyn habarlaǵan.

Microsoft-tyń kommertsııalyq dırektory Djadson Althoff osy aptadaǵy tanystyrylym kezinde JI quraldary satý, klıentterge qyzmet kórsetý jáne baǵdarlamalyq jasaqtama ázirleý sııaqty birneshe salada ónimdilikti arttyrýǵa kómektesip jatqanyn aıtty. Kompanııa sonymen qatar shaǵyn klıenttermen ózara árekettesý úshin de JI-di qoldana bastaǵan.

– Shaǵyn klıenttermen jańa bastama kompanııaǵa on mıllıondaǵan dollar tabys ákelip jatyr, – deıdi Althoff.

Sonymen qatar, JI jańa ónimderge arnalǵan kodtyń 35 paıyzyn ózi jasaǵany atap ótilýde. Bul ónimderdi naryqqa shyǵarý merzimin edáýir qysqartýǵa kómektesken.

Aıta keteıik, Microsoft korporatsııasy bıylǵy ekinshi qysqartý tolqynynda 9 myń qyzmetkerin jumystan bosatatynyn málimdedi.