Microsoft: Windows 10 operatsııalyq júıeniń aldyńǵy nusqalaryn paıdalanýshylarǵa tegin bolady
ASTANA. QazAqparat - Microsoft-tyń Windows 10 operatsııalyq júıesi (OJ) Windows 7, Windows 8 jáne Windows 8.1. syndy aldyńǵy nusqalardy qoldanyp kelgen adamdarǵa bir jyl kóleminde tegin bolady, dep jazady rosbalt.ru.
Jańa OJ AQSh-tyń Redmond qalasynda ornalasqan Microsoft kompanııasynyń shtab-páterinde tanystyryldy.
Aıta keteıik, biz buǵan deıin Microsoft-tyń ǵalamtorda jańa izdeýshi júıe - Spartan braýzeriniń tanystyrylymy bolǵanyn habarlaǵanbyz. Bul baǵdarlama Windows 10-nyń quramynda bolady.
Kompanııa ókili Maıersonnyń habarlaýynsha, olar naryqta bedeli túsip bara jatqan Internet Explorer-di jańǵyrtqannan góri jańa braýzer oılap tapqan durys degen sheshimge kelgen. Sol sebepti Chrome jáne Firefox-ke uqsas, jyldam ári jeńil jumys jasaıtyn Spartan-dy qoldanysqa shyǵarǵan.
Windows 10-nyń jetildirilgen sońǵy nusqasy 2015 jyly satylymǵa shyǵady.
