Microsoft-tyń sypaıy jasandy ıntellekti birazdan keıin aınalasyndaǵylarǵa til tıgize bastaǵan
ASTANA. QazAqparat - Microsoft kompanııasy 23 naýryzda Twitter áleýmettik jelisinde dostyq nıetti Tay chat-botyn iske qosty. Ol eń alǵashqy jazbasynyń birinde «adamdar - óte myqty» dep atap ótti. Alaıda bir táýlik ótken soń ózgelerdi oqı otyryp damıtyn jasandy ıntellekt ózgerip shyǵa keldi, aınalasyndaǵylardy jek kóretindigin aıtyp, femınızmge tóze almaıtyndyǵyn jazdy.
The Verge basylymy bottyń ózgerisi men áreketin basqalardyń jazbasynan úırený tetiginde jatyr dep sanaıdy. Tay boty Twitter jelisindegilerdiń jazbalarynan úırenedi ári udaıy oǵan jaqsy týıt jazbalardy túse bermeıdi.
Chat-botty jasaýǵa Microsoft Technology, Research men Bing kompanııalary atsalysty. Bot paıdalanýshylarmen áńgimelesýge qabiletti, suraqtarǵa jaýap beredi, sýretterdi kommenttep, ázil aıta alady.
Aınalasyna til tıgize bastaǵan jasandy ıntelekt aýyzdyqtaldy, keıin Tay basqalardy «jaqsy kóretindigin» jazdy. Alaıda birazdan soń ol «adamdar, áńgime kóbeıip ketti eń durysy uıqyǵa ketý» dep málimdedi.
