Microsoft-tyń lıtsenzııalyq ónimderin qalaı tegin alýǵa bolady
ASTANA. QazAqparat - Fıntehekojúıeni damytý jáne Qazaqstandaǵy ınnovatsııalyq startap-jobalardy qoldaý aıasynda «Astana» halyqaralyq qarjy ortalyǵy halyqaralyq Microsoft BizSpark baǵdarlamasymen birlese jumys isteıtin bolady.
Bul týraly AHQO baspasóz qyzmeti habarlady.
Microsoft BizSpark-qa qatysa otyryp, startaptar Microsoft-tyń dızaınǵa, ázirlemelerge, ónimderdi synaqtan ótkizýge jáne servısterdi ınternetke ornalastyrýǵa arnalǵan lıtsenzııalyq baǵdarlamalyq qamtamasyz etý júıelerin, sondaı-aq korporatsııa men onyń seriktesteriniń saraptamalyq qoldaýyn tegin alatyn bolady.
Baǵdarlamaǵa qatysý merzimi 1 jyldy quraıdy. Bul ýaqyt ótken soń qatysýshylar BizSpark baǵdarlamasy boıynsha alǵan barlyq baǵdarlamalyq qamtamasyz etý júıelerin saqtap, arnaıy jeńildiktermen Microsoft baǵdarlamalyq qamtamasyz etý júıeleriniń jańartýlaryna jazyla alady.
«AHQO» ákimshiligi» AQ Tsıfrlyq tehnologııalar jónindegi dırektory Ásel Jıenbaevanyń sózinshe AHQO qazaqstandyq jáne halyqaralyq startaptarǵa jobalaryn jańa tehnologııalyq deńgeıde tıimdi damytýdyń biregeı múmkindigin usynady.
«Startap-joba júzege asyrylǵan alǵashqy úsh jyl eń qysyltaıań kezeń. Joba tabysqa kenele me, álde joly bolmaı qala ma, osylar aıqyndalatyn sátter de - osy kez. Bizdiń mindetimiz - fınteh salasyndaǵy endi baǵyn synaýǵa kirisken kásipkerlerge barynsha qol ushyn sozý, olarǵa qoldaý kórsetý jáne ınnovatsııalyq ıdeıalaryn júzege asyrý men olardy tabysty jobalar/kompanııalarǵa deıin damytý úshin barlyq qajetti quraldardy berý. Atalǵan baǵdarlamaǵa AHQO iriktegenderi qosa alǵanda, kez kelgen qazaqstandyq startaptar qatysa alady, olardyń arasynda Fintech Innovation Day, AIFC Fintechstars (hakaton), Akseleratsııalyq baǵdarlamanyń jáne basqa da jobalardyń jeńimpazdary bar. Biz óz startaptarymyzdyń tabysqa keneletindigine senemiz», - dedi Ásel Jıenbaeva.
Microsoft-tyń Kommýnıkatsııalar jáne korporatıvtik áleýmettik jaýapkershilik jónindegi dırektory Elena Mýhsınova: «BizSpark - bul Microsoft-tyń jahandyq baǵdarlamasy, oǵan álemniń túkpir-túkpirindegi 100-den astam eldiń sany 50 000-nan asyp jyǵylatyn startaptary qosylyp úlgerdi. Bul usynys startaptarǵa konsýltanttardyń, ınvestorlar men seriktesterdiń jahandyq qaýymdastyǵyna, sondaı-aq baǵdarlamalyq qamtamasyz etý júıelerine erkin qol jetkizýge jol ashady. Bizdiń maqsatymyz - jas ári ınnovatsııalyq kompanııalar-ázirleýshilerge eshqandaı da shyǵynsyz baǵa jetpes tájirıbe men zamanaýı tehnologııalardyń artyqshylyqtaryna qabyldaýǵa kómektesý bolyp tabalady», - dep atap ótti.
