Microsoft servısterindegi aqaý myńdaǵan qoldanýshyny elektrondy poshtasyz qaldyrdy
ASTANA. KAZINFORM – Microsoft kompanııasynyń birqatar servısinde, sonyń ishinde Outlook, Teams jáne Copilot platformalarynda iri aqaý tirkeldi. Sonyń saldarynan álemniń ártúrli aımaǵyndaǵy myńdaǵan qoldanýshy qyzmetterge qol jetkize almaı, elektrondy hattardy jiberý men qabyldaýda qıyndyqtarǵa tap boldy. Bul týraly Euronews habarlady.
Beısenbi kúni bolǵan aqaý ásirese Amerıka elderinde qatty baıqalǵan. Downdetector servısiniń málimetinshe, AQSh-tyń shyǵys jaǵalaýynda jergilikti ýaqyt boıynsha saǵat 13:30 shamasynda Outlook jumysyna qatysty shaǵymdar sany 120 myńnan asyp, keıin 130 myńnan kóbeıgen. Qoldanýshylar poshta jáshigine kire almaı, hattardy jiberý jáne qabyldaý kezinde irkilister bolǵanyn habarlaǵan.
Microsoft 365 qyzmetindegi aqaýǵa 46 myńnan astam adam shaǵymdanǵan. Al kompanııanyń jumys barysynda keńinen qoldanylatyn Teams platformasyna shamamen 3 myń qoldanýshy kire almaǵan. Budan bólek, jasandy ıntellekt negizindegi Copilot kómekshisinde de irkilister tirkelgen.
Aqaýdyń sebebi
Microsoft kompanııasy aqaýdyń shyǵý sebebin anyqtaý jumystaryn bastaǵanyn rastady. Áleýmettik jelidegi alǵashqy habarlamasynda kompanııa Amerıka elderindegi qoldanýshylar Exchange Online poshta jáshikterine ártúrli qosylý tásilderi arqyly kire almaı jatqanyn jetkizgen.
Keıingi habarlamada aqaýǵa ınfraqurylymnyń keıbir bólikterine ádettegiden joǵary júkteme túsýi sebep bolýy múmkin ekeni aıtyldy. Bul qosylym qatelerine ákelgen.
Máseleniń saldaryn azaıtý úshin Microsoft ınfraqurylymdyq toraptar arasyndaǵy trafıkti qaıta bólýdi josparlap otyr. Bul júktemeni teńestirip, servısterdiń jumysyn qalpyna keltirýge múmkindik beredi.
Teams jumysy Soltústik Amerıkada qalpyna keltirildi
Microsoft málimetinshe, Teams platformasyndaǵy aqaý da kúnniń basynda baıqalǵan. Kompanııa Soltústik Amerıkada servıstiń jumysyn qalpyna keltirgenin habarlady. Degenmen keıbir qoldanýshylar áli de qosylý qıyndyqtaryna tap bolǵan.
Kompanııa aqaýdyń naqty sebepteri men odan zardap shekken qoldanýshylardyń jalpy sany týraly ázirge tolyq aqparat bergen joq. Sonymen qatar Downdetector jınaǵan shaǵymdar sany aqaýǵa tap bolǵan adamdardyń naqty sanyn kórsetpeýi múmkin.
Aıta keteıik, buǵan deıin búkil álemde ChatGPT jáne basqa da servısterdiń jumysy isten shyqqanyn jazǵan edik.
