Microsoft OpenAI tehnologııalaryna eksklıýzıvti qoljetimdilikten aıyryldy
ASTANA. KAZINFORM – OpenAI Microsoft-pen strategııalyq seriktestik sharttaryn qaıta qarap, kompanııany óz tehnologııalaryna eksklıýzıvti qoljetimdilik quqyǵynan aıyrdy. Bul OpenAI-ge óz ónimderin basqa bultty servısterde de ornalastyrýǵa múmkindik beredi, dep habarlaıdy Reuters agenttigi.
Kompanııa jańa kelisim aıasynda óz tehnologııalaryn tek Microsoft platformasynda ǵana emes, sonymen qatar Amazon Web Services jáne Google Cloud sııaqty básekeles bultty platformalarda paıdalanýǵa jol ashty.
Reuters málimetinshe, Microsoft OpenAI-diń negizgi bultty seriktesi bolyp qala beredi jáne 2032 jylǵa deıin kompanııanyń zııatkerlik menshigine lıtsenzııasyn saqtaıdy. Alaıda endi korporatsııa startap tehnologııalaryna eksklıýzıvti qoljetimdilikke ıe emes jáne OpenAI ónimderinen túsetin barlyq tabysty óz bultynda bólý protsesine tolyq qatyspaıdy.
Jańartylǵan kelisim boıynsha OpenAI Microsoft-pen bólisetin tabys kólemi shektelgen jáne endi jasandy jalpy ıntellektini (AGI) jasaý sekildi belgili bir tehnologııalyq kezeńderge qol jetkizýge táýeldi bolmaıdy.
BAQ málimetinshe, bul ózgerister seriktestik qurylymyn jeńildetip, OpenAI-diń korporatıvtik naryqtaǵy kommertsııalyq múmkindikterin keńeıtýge baǵyttalǵan. Buǵan deıin kompanııa óz sheshimderine suranys joǵary bolǵandyqtan Amazon ınfraqurylymyn da qoldana bastaǵan.
Sarapshylardyń aıtýynsha, eksklıýzıvti shekteýlerdiń alynýy OpenAI servısterin AWS jáne Google Cloud júıelerine tehnıkalyq kedergilersiz ońaı ıntegratsııalaýǵa múmkindik beredi.
Osy ózgerister aıasynda bultty jasandy ıntellekt sektoryndaǵy báseke de kúsheıip otyr. Endi korporatıvtik klıentter OpenAI sheshimderin Anthropic sekildi básekeles ónimdermen qatar qarastyra alady.
Buǵan deıin OpenAI basshysy álemdi jasandy ıntellekt ekonomıka men kúndelikti ómirge ákeletin aýqymdy ózgeristerge daıyn bolýǵa shaqyrǵan edi. Atap aıtqanda, jumyssyzdyq boıynsha járdemaqyny arttyrý, qaıta daıarlaý baǵdarlamalary jáne salyq júıesin ózgertý máseleleri sóz bolǵan.
Sondaı-aq bıyl OpenAI Qazaqstannyń 165 myń pedagogine tegin lıtsenzııa beretinin habarlady.
