Microsoft kompanııasy Twitter-di satyp almaq
ASTANA. QazAqparat - Amerıkalyq Microsoft kompanııasy Twitter jelisin satyp alýǵa nıetti.
Bul týraly CNBC telearnasy habarlady.
Telearna málimetinshe, Twitter aldaǵy 35-40 kúnniń ishinde satylýy múmkin. Sondaı-aq habarlanǵandaı, Facebook áleýmettik jelisi satylymǵa qyzyǵýshylyq bildirip otyrǵan joq.
Buǵan deıin Bloomberg agenttigi amerıkalyq Disney kompanııasy jýyq arada Twitter-di satyp alý usynysymen shyǵýy múmkindigin jazǵan bolatyn. Agenttik derekkózderiniń málimetinshe, qazirgi ýaqytta Disney-diń qarjy keńesshileri áleýmettik jeliniń basshylyǵyna usynýǵa bolatyn somanyń kólemin anyqtaý úshin, jeliniń qunyna baǵalaý júrgizý ústinde. Agenttik sondaı-aq, Twitter-diń taǵy bir áleýetti satyp alýshylarynyń biri Saleforce kompanııasy bolyp tabylatynyn rastady.
CNBC arnasy osyǵan deıin Twitter satyp alý týraly usynysty birden birneshe kompanııadan alýy múmkindigin aıtqan. Olardyń arasynda Google-ǵa ıelik etetin Alphabet korporatsııasy, Apple jáne magnat Rýpert Merdokqa tıesili 21st Century Fox holdıngi bar.
Twitter áleýmettik jelisi - bul qysqa habarlamalarmen bólisýge arnalǵan mıkroblogtar servısi. Onyń aı saıynǵy aýdıtorııasy 300 mln. adamnan asyp jyǵylady. Kompanııanyń naryqtaǵy quny 14 mlrd. dollardy quraıdy.
