Microsoft kompanııasy balalardyń ınternettegi qaýipsizdigin qamtamasyz etedi
ALMATY. Maýsymnyń 3-i. QazAqparat /Erbol Turymbetov/ - Búgin Almatydaǵy «Tıan-Shan» qonaqúıinde «Aqparattyq tehnologııalar jáne ınternet álemindegi balalardyń densaýlyǵy men qaýipsizdigi» atty qalalyq konferentsııa bolyp ótti,
dep habarlaıdy QazAqparat.
Jıyndy Microsoft Qazaqstan jáne Almaty qalalyq biliktilikti arttyrý jáne bilim berý júıesi kadrlaryn qaıta daıarlaý ınstıtýty birlese uıymdastyrdy. Sharanyń maqsaty atalǵan máselelerge kópshiliktiń nazaryn aýdarý, ony sheshý joldaryn qarastyrý jáne ınternette qaýipsiz jumys jasaýdyń ádisteri men qazirgi zamanǵy tehnologııalardy tanystyrý.
«Bizdiń zamanymyzda kompıýterlik tehnologııalar men ınternettiń ómirimizdegi orny artyp, halyqtyń fızıkalyq jáne psıhıkalyq jaǵdaıyna keri áserin azaıtý qajettiligi týyndaýda. Bul másele, ásirese, bala qaýipsizdigine qatysty. Sebebi, qazirgi zamanǵy aqparattyq-kommýnıkatsııalyq tehnologııalar arqyly balanyń daǵdylary men qabiletterin damytyp qana qoımaı, onyń densaýlyǵyna nuqsan keltirýge de bolady», - deıdi Almaty qalasy BA BJKQI dırektorynyń orynbasary Raýshan Ahmedova.
«Balalardyń ınternettegi qaýipsizdigi» baǵdarlamasy - Microsoft kompanııasynyń bastamasy. Maıkrosoft usynyp otyrǵan Windows baǵdarlamalyq qamsyzdandyrýy balalardy ınternettiń zalaldy ári qaýipti áserinen arashalaýǵa múmkindik beredi.
«Bizdiń maqsatymyz - ata-analar men muǵalimderdi jańa tehnologııalardy qaýipsiz qoldanýǵa úıretý. Osy qyzmetimizben balalarǵa qaýipsiz qarym-qatynas ornatý jáne ıntellektýaldy damý múmkindigin usynamyz», - dedi Maıkrosoft Qazaqstan Bas dırektory Gıýnter Dam.
Konferentsııada Microsoft Qazaqstan kompanııasy men birqatar joǵaǵy oqý oryndary boldy. Sondaı-aq, qalalyq №20, №83, №12 mektep muǵalimderi men oqýshylary da qatysty.
