Microsoft kompanııasy jasyl karta baǵdarlamasynan shyǵaryldy
ASTANA. KAZINFORM — Tramp ákimshiligi H-1B vızasymen AQSh-qa kelip, jumys isteıtin jumysshylarǵa arnalǵan jasyl karta baǵdarlamasyna Microsoft kompanııasynyń qatysýyn toqtatty, dep habarlaıdy Kazinform agenttiginiń Vashıngtondaǵy menshikti tilshisi NBC News-ke silteme jasap.
AQSh vıtse-prezıdenti Dj.D. Vens Microsoft kompanııasyn óz múmkindikterin teris paıdalandy dep aıyptap otyr. Onyń pikirinshe, kompanııa jaldaǵan sheteldik jumysshylar túptiń túbinde amerıkalyqtardy eńbek naryǵynan yǵystyrady.
Vens jáne ákimshiliktiń basqa da joǵary laýazymdy sheneýnikteri ýnıversıtetterdi aqparattyq tehnologııalar salasynda oqıtyn halyqaralyq stýdentterge J-1 vızalaryn bergeni úshin synnyń astyna aldy.
Vens kompanııalardan amerıkalyq jumysshy tapshy dep sheteldik jumysshyǵa jasyl karta alý úshin Eńbek mınıstrligine ótinish bermes buryn bos jumys oryndary týraly habarlandyrý jarııalaýdy talap etedi.
Venstiń aıtýynsha, Microsoft byltyr 6000 amerıkalyqty jumystan shyǵaryp, 6300 H-1B vızasy men 3000-ǵa jýyq jasyl karta alǵan.
Óz kezeginde shtab-páteri Vashıngton shtatynyń Redmond qalasynda ornalasqan Microsoft kompanııasy «AQSh-taǵy Microsoft qyzmetkerleriniń basym kópshiligi amerıkalyqtar» dep málimdedi. Sonymen qatar, kompanııa ótken qarjy jylynda bergen 6000 H-1B vızasyna ótinishtiń 80%-y jańa jumysshy jaldaýmen emes, Microsoft jumyskerleriniń mártebesiniń uzarýy nemese ózgertýine baılanysty ekenin aıtyp aqtaldy.
Vens sonymen qatar Garvard, Iel, Stenford, Braýn, Pıttsbýrg, Kalıfornııa ýnıversıtetteri, Kalıfornııa tehnologııalyq ınstıtýty jáne Massachýsets tehnologııalyq ınstıtýty sııaqty ýnıversıtetterdi synady.
Venstiń málimdemesi Donald Tramp Microsoft kompanııasynyń bas dırektory Satıa Nadellaǵa Ulttyq tehnologııa jáne ınnovatsııa medalin tapsyrardan birneshe saǵat buryn jasaldy. «Ǵylym: Jańa altyn ǵasyr» sammıtinde ımmıgranttardyń amerıkandyq ınnovatsııaǵa aıtarlyqtaı úles qosatyny aıtylǵan bolatyn.
