«Microsoft» QazUÝ-dyń IT-tehnologııalardy damytý jumysyn joǵary baǵalady

Qazaqstan halqyna arnalǵan «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty Joldaýynda qoıylǵan mindetter aıasynda QazUÝ Memleket basshysynyń bastamalaryn júzege asyrýda.

Qazaqstan Prezıdenti Nursultan Nazarbaev 2015 jyly Qytaı Halyq Respýblıkasynyń Tóraǵasy Sı Tszınpınmen kezdesý barysynda QazUÝ bazasynda «Silicon Valley» úlgisine negizdelgen álemdik deńgeıdegi ІT-tehnoparkin qurýdy usyndy. Bul ıdeıany iske asyra otyryp, QazUÝ álemniń 130-dan astam joǵary oqý ornyn biriktiretin Jańa Jibek Joly ýnıversıtetteriniń alıansymen birlesip halyqaralyq IT-tehnoparkin qurýda.

Bul aýqymdy joba Alıanstyń atqarýshy komıteti, sondaı-aq reseılik «Skolkovo» ınnovatsııalyq ortalyǵynyń ınnovatsııalyq ókilderi tarapynan qoldaý tapty. Atalǵan uıymdar QazUÝ-men ınnovatsııa, ǵylym jáne joǵary tehnologııalar salasynda ortaq jumys jasaýǵa daıyn ekendigin bildirdi.

«Tehnoparktyń ıadrosy Qytaı úkimetiniń granty boıynsha alynatyn sýperkompıýter bolmaq. Jobany iske asyrý Qazaqstan ýnıversıtetteri men Alıans músheleri úshin biryńǵaı derekterdi óńdeý ortalyǵyn qalyptastyrýǵa, sandyq qyzmetterdi usynýǵa jáne ǵylymı jobalarǵa arnalǵan joǵary tıimdi esepteýdi júrgizýge múmkindik beredi. QazUÝ sýperkompıýteri álemdegi TOP-500-ge kiretin qýatty esepteý resýrsyna aınalatynyn atap ótken jón», - dep aıtylǵan habarlamada.

Búginde QazUÝ-da IT-tehnologııalardy damytýdyń negizgi baǵyttary aıqyndalǵan, atap aıtqanda ýnıversıtettiń qyzmetin avtomattandyrý úshin bultty tehnologııalar; kampýstyń ınfraqurylymyn basqarý maqsatynda smart-tehnologııalar; taldaý júıesin qalyptastyrý úshin Big Data tehnologııalaryn engizý; sondaı-aq ІT qyzmetteriniń aýtsorsıngin damytý bolyp tabylady. Jyldyń basynda QazUÝ-da jańa ІT fakýlteti ashyldy, onda joǵary tehnologııalar salasyndaǵy mamandar daıarlaý isi shoǵyrlanǵan.

QazUÝ-da Microsoft, Hewlett-Packard, Cisco, Konika Minolta, Fujitsu, Huawei, Samsung, «Kasperskıı zerthanasy» jáne basqa da álemdik jetekshi kompanııalardyń ǵylymı-bilim berý ortalyqtarynyń ashylýy ýnıversıtettiń IT-tehnologııalardy damytý men engizýdegi jetistikteri men aldyńǵy qatarly pozıtsııalarynyń tanylýynyń dáleli.

Osylaısha, álemge áıgili «Microsoft» kompanııasy ýnıversıtettiń zamanaýı IT-tehnologııalardy damytý jáne keńinen engizýdegi  jumysyn joǵary baǵalady. QazUÝ «Microsoft Campus Connections» sammıtinde «E-kampýs» jobasyn usyný múmkindigine ıe bolǵan TMD elderindegi birden-bir ýnıversıtet bolyp tabylady. Bul joba kompanııa ókilderi men shetel ýnıversıtetteriniń qyzyǵýshylyǵyn týdyrdy. «Microsoft» QazUÝ-dyń strategııalyq áriptesi retinde ýnıversıtette «Microsoft Power BI» bult bıznes-taldaý qyzmetin engizý.

Ýnıversıtettiń «E-campus» baǵdarlamasy aıasynda barlyq bıznes-protsester tsıfrly formatqa aýystyrylǵany atap ótiledi. Oqý protsesin, ǵylymı-zertteý, áleýmettik-ekonomıkalyq jáne ákimshilik-basqarý qyzmetin ıntegratsııalyq basqarý zamanaýı baılanys quraldarymen jabdyqtalǵan jaǵdaılyq basqarý ortalyǵymen qamtamasyz etilýde.

ІT jáne qashyqtyqtan oqytý tehnologııalaryn belsendi damytý ashyq bilim berýdi damytýǵa yqpal etti. QazUÝ-dyń jeke ashyq onlaın-kýrstaryn qurý jónindegi jumysy 2016 jyly QR Joǵary mektebiniń Ulttyq Ǵylym Akademııasy jáne QR Bilim jáne ǵylym mınıstrliginiń qoldaýymen Ashyq bilim berýdiń Ulttyq platformasyn (moocs.kz) qurýǵa múmkindik berdi. Bul bastamaǵa Jańa Jibek Joly Ýnıversıtetter Alıansynyń joǵary oqý oryndary da qoldaý bildirdi.

Búgin ál-Farabı atyndaǵy QazUÝ  elimizde teńdesi joq ǵylymı jáne ınnovatsııalyq ınfraqurylymy bar ıntellektýaldy korporatsııa bolyp tabylady. «Al-Farabi university - smart city» atty keshendi ǵylymı-ınnovatsııalyq jobasy sheńberinde Qazaqstannyń jańa tsıfrly ekonomıkasy úshin mamandar daıarlanyp, básekege qabiletti ulttyń tabysty damýy úshin kúshti rýhanı-adamgershilik jáne zııatkerlik tuǵyrnamasy qalyptastyrylýda.