Microsoft Izraıl áskerine qyzmet kórsetýdi toqtatty

ASTANA. KAZINFORM — Microsoft kompanııanyń bulttyq tehnologııasyn palestınalyqtardy jappaı baqylaý úshin paıdalandy degen aqparattan keıin Izraıl qorǵanys mınıstrliginiń bólimshesine belgili bir qyzmetterdi kórsetýdi toqtatty. Bul týraly ANEZ agenttigi jazdy.

Bul sheshimdi Microsoft prezıdenti Bred Smıt rastady. Ol kompanııanyń Izraıl áskerı bólimshesi úshin «birqatar qyzmetterdi toqtatyp, óshirgenin» aıtty. Bul qadam The Guardian men ızraıldik +972 jýrnalynyń zertteýinen keıin jasaldy. Onda Izraıl áskerı barlaýynyń bólimshesi bolyp tabylatyn Unit 8200 Gaza sektory men basyp alynǵan Batys jaǵalaýdaǵy palestınalyqtardyń mıllıondaǵan telefon qońyraýlaryn saqtaý úshin Microsoft Azure qoldanbasyn paıdalandy dep jazylǵan.

Maıkrosoft tekserý jumystaryn 15 tamyzdan bastaǵan. Biraq saqtalǵan materıaldardyń mazmunyn emes, iskerlik jazbalardy, qarjylyq esepterdi jáne ishki qujattardy qaraı bastaǵanyn aıtty. Smıt Microsoft korporatsııasy bul standartty búkil álemde qoldansa da, beıbit turǵyndardy jappaı baqylaý tehnologııasyn qamtamasyz etpeıtinin atap ótti.

Kompanııanyń aıtýynsha, onyń sholýy esepterdiń keıbir elementterin, sonyń ishinde Izraıldiń Nıderlandydaǵy Azure qoımasyn jáne Microsoft jasandy ıntellekt qyzmetterin paıdalanýyn rastaıtyn dálelder tapty. Osyǵan baılanysty Microsoft Izraılge belgili bir jazylymdardy jáne baılanysty bultty saqtaý jáne jasandy ıntellekt qyzmetterin toqtatatynyn habarlady.

Izraıldiń qaýipsizdik qyzmetiniń ókili bul sheshim Izraıl qorǵanys kúshteriniń operatsııalyq múmkindikterine áser etpeıtinin aıtty. Al Microsoft taldaý jumystary jalǵasyp jatqanyn málimdedi.

Buǵan deıin Du kompanııasy men Microsoft 544 mln dollarǵa aýqymdy derekterdi óńdeý ortalyǵyn iske qosatyny týraly jazdyq.