Microsoft balama nusqalarynan áldeqaıda jyldam jumys isteıtin jańa braýzerdi qoldanysqa shyǵarmaqshy
ASTANA. QazAqparat - Amerıkalyq Microsoft kompanııasy Spartan degen ataýǵa ıe bolǵan jańa braýzerdi (ǵalamtor saıttaryn qaraýǵa arnalǵan baǵdarlama) daıyndaý ústinde, dep habarlaıdy TASS.
Spartan óz jyldamdyǵymen erekshelengenimen, tanymal Firefox jáne Chrome braýzerlerine uqsas bolady. Ol Microsoft-tyń Windows 10 - jańa operatsııalyq júıesimen bir mezgilde qoldanysqa berilmek.
Ǵalamtor resýrsynyń málimetinshe, Windows 10 operatsııalyq júıesiniń shyǵarylýymen qatar, Internet Explorer 11 de kópshilikke usynylady. Bul rette, Spartan-nyń kem degende eki nusqasy: mobıldi jáne kompıýterge arnalǵan túri shyǵarylatynyn atap ótý kerek.
Spartan - baǵdarlamanyń ýaqytsha ataýy. Keıin onyń ózgertilýi de múmkin.
